حیدرآباد (دکن فائلز) آئی سی سی ٹی ٹوئنٹی ورلڈکپ 2026 سے متعلق بڑا انکشاف سامنے آگیا ہے، جس کے مطابق ہندوستان اور پاکستان ایک ہی گروپ میں شامل ہوں گے اور دونوں روایتی حریف 15 فروری کو کولمبو میں ٹکرائیں گے۔
میڈیا رپورٹس کے مطابق ایونٹ 7 فروری سے 8 مارچ تک کھیلا جائے گا اور مکمل شیڈول 25 نومبر کو جاری ہوگا۔ میڈیا رپورٹس کے مطابق ٹورنامنٹ میں 20 ٹیمیں حصہ لیں گی جنہیں چار گروپس میں تقسیم کیا جائے گا۔ ہر گروپ سے دو ٹیمیں سپر 8 میں جائیں گی۔
ہندوستان اور پاکستان کے گروپ میں نیدرلینڈز، نمیبیا اور یو ایس اے شامل ہونے کا امکان ہے، جبکہ میزبان سری لنکا کے گروپ میں آسٹریلیا، زمبابوے، آئرلینڈ اور عمان کی شمولیت متوقع ہے۔
ممبئی، کولکتہ، چنئی، دہلی اور احمد آباد ہندوستان میں میزبان وینیوز ہوں گے، جبکہ پاکستان کے تمام میچز سری لنکا میں کرائے جائیں گے۔ فائنل کا میزبان اگرچہ احمد آباد منتخب کیا گیا ہے، لیکن اگر پاکستان فائنل میں پہنچتا ہے تو فیصلہ کن میچ کولمبو منتقل کردیا جائے گا۔
سیمی فائنلز کے لیے ممبئی اور کولکتہ کا انتخاب ہوا ہے، تاہم پاکستان کی ممکنہ پیشرفت صورت میں سیمی فائنل بھی سری لنکا میں ہی ہوگا۔ واضح رہے کہ پاکستان کا ایک بھی میچ ہندوستان کے کسی بھی اسٹیڈیم میں نہیں کھیلا جائے گا۔
