مدینہ بس حادثہ: آصف نگر حیدرآباد کے شعیب محمد معجزاتی طور پر محفوظ، بس میں سوار دیگر تمام عمرہ زائرین جاں بحق
حیدرآباد (دکن فائلز) مدینہ منورہ کے قریب پیر کی صبح پیش آنے والے المناک بس حادثے میں حیدرآباد کے آصف نگر کے 24 سالہ عبدالشعیب محمد واحد زندہ بچ جانے والے مسافر کے طور پر سامنے آئے ہیں، جبکہ کم از کم 42 عمرہ زائرین اس حادثے میں جاں بحق ہوگئے۔ شعیب اس وقت مدینہ کے جرمن اسپتال میں تشویشناک حالت میں زیرِعلاج ہیں۔
اطلاعات کے مطابق زائرین دو حیدرآبادی ٹور آپریٹرز کے ذریعے سفر پر روانہ ہوئے تھے، ال مینا ٹورس اینڈ ٹریولز، ملے پلی اور فلائی زون ٹورس اینڈ ٹریولز مہدی پٹنم۔
یہ تمام زائرین 9 نومبر کو حیدرآباد سے روانہ ہوئے تھے۔ مکہ مکرمہ میں عمرہ کی ادائیگی کے بعد وہ مدینہ منورہ جا رہے تھے کہ مدینہ سے تقریباً 160 کلو میٹر دور محرس/مُفرحت کے علاقے میں ان کی بس کا تیل بردار ٹینکر سے تصادم ہوگیا۔ یہ حادثہ سعودی وقت کے مطابق رات تقریباً 1:30 بجے (بھارتی وقت صبح 4 بجے) پیش آیا۔
ذرائع کے مطابق شعیب ڈرائیور کے قریب بیٹھے ہوئے تھے، اسی وجہ سے شدید زخمی ہونے کے باوجود زندہ بچ گئے، جبکہ حادثہ کے فوراً بعد بھڑکنے والی آگ نے دیگر مسافروں کو سنبھلنے کا موقع نہ دیا۔
جاں بحق افراد کی میتیں مدینہ کے کنگ فہد، میقات اور کنگ سلمان اسپتالوں منتقل کردی گئی ہیں۔ کئی لاشوں کی حالت کے باعث شناخت میں دشواریاں پیش آ رہی ہیں اور حکام انتہائی احتیاط سے یہ عمل انجام دے رہے ہیں۔
مسافر فہرست کے مطابق 45 افراد میں سے 42 ہلاک، ایک زندہ بچا جبکہ دو افراد کی تصدیق کا عمل جاری ہے۔ جدہ میں ہندوستانی قونصل خانہ ضروری کارروائی میں مصروف ہے، جبکہ حیدرآباد میں اہلِخانہ سرکاری تصدیق کے منتظر ہیں۔
مدینہ منورہ میں سڑک حادثہ: جاں بحق حیدرآبادی عمرہ زائرین کی تفصیلات (ناموں کی فہرست)
