حیدرآباد (دکن فائلز) جمعیت العلماء تلنگانہ (محمود مدنی) کے ریاستی انتخابات آج نہایت خوشگوار اور پُرامن ماحول میں منعقد ہوئے، جس میں تلنگانہ بھر کے 550 صوبائی منتظمہ ارکان نے بھرپور جوش و خروش کے ساتھ حصہ لیا۔ انتخابی مرحلے میں ریاست کے معروف عالمِ دین مفتی سید احسان الدین قاسمی کو متفقہ طور پر صدر جمعیت العلماء تلنگانہ منتخب کیا گیا، جس پر اجلاس میں موجود تمام اراکین نے اظہارِ مسرت کیا۔
انتخابات کی نگرانی صدر جمعیت العلماء ہند مولانا سید محمود مدنی کی ہدایت پر دہلی سے آئے ممتاز مبصرین—حضرت سلمان صاحب منصوپوری (نائب امیر امارت شرعیہ، جمعیت العلماء)، مولانا محمد عمر قاسمی—کے علاوہ تلنگانہ جمعیت کے سابق جنرل سکریٹری حافظ پیر خلیق احمد نے کی۔ مبصرین نے پورے عمل کو انتہائی منظم، شفاف اور پُرسکون قرار دیا۔
حیدرآباد کے معروف عالمِ دین مولانا عبدالقوی صاحب نے مفتی سید احسان الدین قاسمی کا نام صدر کے لیے پیش کیا، جسے تمام اراکین نے اتفاقِ رائے سے منظور کیا۔ اسی طرح نائب صدور کے لیے چار علما کا انتخاب عمل میں آیا جن میں مولانا محمد عبدالقوی صاحب رکن عاملہ، مولانا مصدق القاسمی، مولانا عبدالستار قاسمی اور مولانا سعید احمد قاسمی شامل ہیں۔
خازن کے عہدے کے لیے حضرت مولانا مصباح الدین قاسمی منتخب ہوئے۔
انتخابی اجلاس میں مہمانِ خصوصی کی حیثیت سے مفتی حسین احمد مظاہرہ (آندھرا پردیش)، مولانا عبدالوارث قاسمی صدر ونپرتی سمیت دیگر معزز علمائے کرام نے شرکت کی۔ علما نے نئی قیادت کو مبارک باد دیتے ہوئے اُمید ظاہر کی کہ جمعیت العلماء تلنگانہ کے بینر تلے ریاست میں دینی و سماجی خدمات کا سلسلہ مزید مضبوط ہوگا۔
