ترک انٹلیجنس فورسس نے شام میں کارروائی کرتے ہوئے داعش کے سربراہ ابوالحسین القریشی کو ہلاک کردیا ہے۔ ترکیہ کے صدر رجب طیب اردغان نے میڈیا کو بتایا کہ ان کی انٹلیجنس فورسس نے داعش کے سربراہ کو شام میں ایک آپریشن کے دوران ہلاک کردیا۔
انہوں نے کہا کہ داعش کے سربراہ کے خلاف کارروائی شام کے علاقہ جندراریس میں کی گئی۔ ترک صدر کا کہنا تھا کہ ان کی انٹلیجنس کافی عرصہ سے داعش سربراہ ابوالحسین کا تعاقب کررہی تھی۔ جس علاقہ میں داعش کے سربراہ کو ہلاک کیا گیا وہ علاقہ ترکیہ کے حمایت یافتہ باغی گروپ کے زیرکنٹرول ہے۔ نومبر 2022 میں داعش سربراہ ابوالحسن الہاشمی کے مارے جانے کے بعد ابوالحسین القریشی کو داعش کا نیا سربراہ بنایا گیا تھا۔
ترکیہ کے صدر نے مزید کہا کہ ہم دہشت گرد تنظیموں کے ساتھ بغیر کسی امتیاز کے اپنی جدوجہد جاری رکھیں گے۔ تاہم داعش (آئی ایس آئی ایس) کی جانب ان کے سربراہ کی ہلاکت کے حوالے سے تاحال کوئی بیان سامنے نہیں آیا ہے۔
