حیدرآباد (دکن فائلز) چنئی سپر کنگز نے گجرات ٹائٹنز کو 5 وکٹوں سے شکست دے کر پانچواں انڈین پریمیئر لیگ ٹائٹل جیت لیا۔ چنئی سپر کنگز نے آئی پی ایل 2023 سیزن کا ٹائٹل جیت لیا ہے۔ رویندر جڈیجہ (6 گیندوں پر ناٹ آؤٹ 15) نے آخری گیند تک گجرات ٹائٹنز کے خلاف شاندار بلے بازی کرتے ہوئے ٹیم کو 5 وکٹوں سے کامیابی دلائی۔ آخری 2 گیندوں میں، چنئی کو جیتنے کے لیے 10 رنز درکار تھے تاہم جڈیجہ نے ایک بال میں 6 رن جبکہ دوسرے میں 4 رن بناکر یادگار یننگ کھیلی اور ٹیم کو جیت دلانے میں اہم کردار ادا کیا۔
میچ میں پہلے بیٹنگ کرتے ہوئے گجرات ٹائٹنز نے مقررہ 20 اوورز میں 4 وکٹوں پر 214 رنز بنائے۔ تباہ کن بلے بازی کا مظاہرہ کرنے والے سائی سدرشن نے 47 گیندوں پر 8 چوکوں اور 6 چھکوں کی مدد سے 96 رن بنائے جبکہ ریدھیمان ساہا نے 39 گیندوں پر 5 چوکوں کی مدد سے شاندار 54 رن اسکور کئے۔
اسی طرح شبمن گل نے 39 اور ہاردک پانڈیا نے 21 (ناٹ آؤٹ) رن بنائے۔ وہیں چنئی کے گیند بازوں میں پتھیرانا نے دو وکٹیں لیں۔رویندرا جدیجا اور دیپک چاہر نے ایک ایک وکٹ حاصل کی۔
بعد ازاں چنئی سپر کنگز نے مقررہ 15 اوورز میں 5 وکٹوں کے نقصان پر 171 رنز بنا کر کامیابی حاصل کی۔ ڈیون کونوے 47، شیوم دوبے 32، امباتی رائیڈو 19 اور اجنکیا رہانے نے 27 رن بنائے۔ گجرات کے گیند بازوں میں موہت شرما نے تین اور نور احمد نے ایک وکٹ حاصل کی۔
ایک بڑے ہدف کا تعاقب کرنے والی چنئی سپر کنگز کو بارش نے غیر متوقع جھٹکا دیا۔ تیز بارش کے باعث تین گیندیں کھیلنے کے بعد امپائرز نے کھیل روک دیا۔ اس کے بعد بارش رک گئی لیکن گراؤنڈ دلدل بن گیا اور کھیل دوبارہ شروع ہونے میں وقت لگا۔ آخر کار اوورز کے ساتھ ہی ہدف کو کچھ کم کیا گیا اور کھیل کو دوبارہ شروع کیا گیا۔ ڈک ورتھ لوئس طریقہ کار کے مطابق چنئی کو 15 اوور میں 171 رنز کا ہدف دیا گیا۔
سلامی بلے باز روتھوراج گائیکواڈ اور ڈیون کونوے نے زبردست شروعات کی۔ اس جوڑی نے ہر اوور میں باؤنڈری لگائی اور تیز رنز بنائے۔ 6 اوور کے اختتام پر چنئی نے بغیر کوئی وکٹ گنوائے 72 رنز بنائے۔ نور احمد نے جوڑی کو توڑ دیا جو کہ کریز پر خطرناک بن چکی تھی۔
اس کے بعد شیوم دوبے اور اجنکیا رہانے نے اننگز کو آگے بڑھایا۔ شیوم دوبے نے آہستہ کھیلا لیکن اجنکیا رہانے نے سخت کھیلا۔ لیکن موہت شرما نے رہانے کی رفتار کو توڑ دیا اور انہیں پویلین روانہ کردیا۔
بعدازاں شیوم دوبے نے راشد خان کی گیند پر لگاتار دو چھکے لگائے اور چنئی کے موقف کو بہتر کیا۔ چنئی کو جیت کے لیے آخری 18 گیندوں پر 38 رنز درکار تھے۔ موہت شرما کے 13ویں اوور میں امباتی رائیڈو 6، 4، 6 پر کیچ آؤٹ ہوئے۔ دھونی جب کریز پر آئے تو چنئی کو جیت کے لیے 14 گیندوں میں 22 رنز درکار تھے۔
لیکن دھونی گولڈن ڈک آؤٹ کے طور پر پویلین لوٹ گئے۔ میچ سنسنی خیز ہوگیا۔ چنئی کو جیتنے کے لیے آخری 12 گیندوں میں 21 رنز درکار تھے۔ چنئی کو آخری اوور میں جیت کے لیے 13 رنز درکار تھے۔ موہت شرما کی جانب سے ڈالے گئے آخری اوور میں پہلی تین گیندوں پر تین رنز بنائے گئے۔ جڈیجہ نے آخری دو گیندوں پر ایک چھکا اور ایک چوکا لگا کر فتح کو کو شاندار فتح دلائی۔
