نصیرالدین شاہ کا بھارت کے ’نئے پارلیمنٹ ہاؤس‘ کی افتتاحی تقریب پر شدید ردِعمل

حیدرآباد (دکن فائلز) سینئر اداکار نصیرالدین شاہ نے نئے پارلیمنٹ کی افتتاحی تقریب پر تنقید کی ہے۔ انہوں نے صیرالدین شاہ نے کہا کہ پارلیمنٹ کی نئی عمارت کا افتتاح اس بات کا ثبوت ہے کہ سپریم لیڈر اپنے لیے ایک یادگار بنانا چاہتے ہیں۔ اُنہوں نے پارلیمنٹ کی نئی عمارت کی ضرورت کو تسلیم کرتے ہوئے کہا کہ پرانی عمارت 100 سال پرانی تھی، اس لیے یہ بات سمجھ میں آتی ہے کہ ایک نئی عمارت کی ضرورت تھی لیکن کیا جس طرح افتتاحی تقریب منعقد کی گئی تھی، ایسی افتتاحی تقریب کی بھی ضرورت تھی؟ جہاں صرف اور صرف مذہبی رسومات کو ادا کیا گیا۔ ایسا محسوس ہورہا تھا کہ یہ کوئی مذہبی تقریب ہے۔
اُنہوں نے کہا کہ آپ جمہوری ملک کی پارلیمنٹ میں پنڈتوں سے گھرے ہوئے ایسے داخل ہوتے ہیں گویا برطانیہ کا بادشاہ پادریوں سے گھرا ہوا ایک عصا لے کر محل میں داخل ہوا ہو۔ اُنہوں نے مزید کہا کہ نئی عمارت ہمارے ملک میں ’جمہوریت کی علامت‘ ہے اور مجھے امید ہے کہ یہ جمہوریت کو محفوظ بھی رکھے گی۔
واضح رہے کہ نئی پارلیمنٹ کی عمارت کی افتتاحی تقریب کا اپوزیشن کی 20 پارٹیوں نے بائیکاٹ کیا تھا۔