حیدرآباد (دکن فائلز) ورلڈکپ کے 33 ویں میچ میں ہندوستان نے سری لنکا کے چھکے چھڑا دیئے اور یکطرفہ مقابلے میں 302 رنز کے بڑے مارجن سے شکست دے کر سیمی فائنل کے لیے کوالیفائی کرلیا۔ ممبئی کے واکھنڈے اسٹیڈیم میں کھیلے گئے ورلڈکپ کے 33 ویں میچ میں سری لنکن کپتان کوشل مینڈس نے ٹاس جیت کر ٹیم انڈیا کو پہلے بیٹنگ کی دعوت دی۔
ہندوستان نے مقررہ 50 اوورز میں 8 وکٹوں کے نقصان پر 357 رنز بنائے،شبمن گل 92، ویرات کوہلی 88 اور شریاس ائیر 82 رنز بناکر نمایاں رہے۔ ٹیم انڈیا کے 358 رنز کے ہدف کے تعاقب میں سری لنکن بیٹنگ لائن ریت کی دیوار ثابت ہوئی اور صرف 55 رنز پر ڈھیر ہوگئی۔ 302 رنز کے بھاری مارجن سے کامیابی کے بعد ہندوستان ورلڈکپ کے سیمی فائنل میں پہنچ گیا۔ ٹیم انڈیا سیمی فائنل میں پہنچنے والی پہلی ٹیم ہے۔
ٹیم انڈیا اب تک ٹورنامنٹ میں ناقابل شکست رہی، ہندوستان نے 7 میچز کھیلے اور تمام میں کامیابی حاصل کی ہے جبکہ سری لنکا 7 میچز میں صرف 2 میچ جیت سکا ہے۔
