حیدرآباد (دکن فائلز) ہندوستانی اسٹار ٹینس کھلاڑی ثانیہ مرزا کے سابق شوہر اور پاکستانی کرکٹر شعیب ملک نے اپنی تیسری اہلیہ اور اداکارہ ثنا جاوید سے علیحدگی کی خبروں کی سختی سے تردید کرتے ہوئے سوشل میڈیا پر تصاویر شیئر کیں جن میں وہ دونوں خوشگوار لمحات گزارتے نظر آ رہے ہیں۔
شعیب ملک نے انسٹاگرام پر یونیورسل اسٹوڈیوز فلوریڈا کی تصاویر پوسٹ کیں، جن میں وہ اور ثنا جاوید مختلف مقامات پرمحبت بھرے لمحات گزارتے دکھائی دئے، بعض تصاویر میں وہ اسکو بی ڈو ، ٹرانسفارمرز روبوٹس کے سامنے اور کچھ تصاویر میں ریونج آف دی ممی رائیڈ کے ساتھ نظر آئے۔
مداحوں نے ان تصاویر پر خوشی کا اظہار کیا اور اطمینان ظاہر کیا کہ یہ جوڑی اب بھی ساتھ ہے اور خوشگوار زندگی گزار رہی ہے۔ سوشل میڈیا پر وائرل ہونے والی ایک ویڈیو نے شعیب ملک اور ثنا جاوید کے تعلقات پر گہرے سوالات اٹھا دیے۔ ویڈیو میں دونوں کو ایک تقریب میں الگ الگ بیٹھے اور ایک دوسرے سے لاتعلق دیکھا گیا۔ مداحوں نے اس منظر کو ان کے تعلقات میں دراڑ کی علامت قرار دیا۔
شعیب ملک اور ثنا جاوید نے جنوری 2024 میں شادی کی تھی، جو شعیب ملک کی سابقہ اہلیہ ثانیہ مرزا سے علیحدگی کے فوراً بعد ہوئی۔ اس سے قبل شعیب ملک کی پہلی شادی عائشہ صدیقی سے ہوئی تھی، جو آٹھ سال تک برقرار رہی۔ دلچسپ بات یہ ہے کہ شعیب ملک کی دونوں سابقہ بیویوں کا تعلق کا تعلق حیدرآباد دکن سے ہے۔
2010 میں انہوں نے ثانیہ مرزا سے شادی کی اور 2018 میں بیٹے اذہان مرزا ملک کی پیدائش ہوئی، لیکن 2024 میں یہ رشتہ بھی انجام کو پہنچا۔ شعیب ملک نے ثنا جاوید سے شادی سے قبل 2024 میں ثانیہ مرزا کو طلاق دی تھی، ثانیہ مرزا کے اہلِ خانہ نے اس وقت بیان جاری کرتے ہوئے کہا تھا کہ ثانیہ ہمیشہ اپنی ذاتی زندگی کو نجی رکھتی ہیں، وہ شعیب کی آئندہ زندگی کے لیے نیک خواہشات رکھتی ہیں اور مداحوں سے بھی گزارش ہے کہ ان کی پرائیویسی کا احترام کریں۔
