حیدرآباد (دکن فائلز) نمازِ استسقاء کی ادائیگی کے کچھ ہی وقت بعد مکہ مکرمہ میں اچانک بارش کا آغاز ہوا تو مسجد الحرام کا منظر نہایت روحانی کیفیت اختیار کر گیا۔ ہفتے کی صبح نمازِ فجر کے بعد برسنے والی بارش نے فضا کو معطر کر دیا، مگر عمرہ ادا کرنے والے لاکھوں زائرین نے اپنے معمولاتِ عبادت میں کوئی وقفہ نہیں آنے دیا۔ طوافِ کعبہ، دعاؤں اور ذکرِ الٰہی کے درمیان بارش کی ٹھنڈی بوندیں عبادت گزاروں کے لیے غیر معمولی روحانی تجربہ ثابت ہوئیں، جن کی ویڈیوز اور تصاویر سوشل میڈیا پر بڑی تیزی سے وائرل ہوگئیں۔
مکہ ہی نہیں، مدینہ منورہ میں بھی زائرین اور مقامی باشندوں نے بارش کے دوران نمازِ جمعہ کی ادائیگی کا منفرد موقع پایا۔ سعودی میڈیا کے مطابق مملکت کے کئی علاقے، جن میں مکہ، مدینہ، عسیر اور دارالحکومت ریاض شامل ہیں، گزشتہ چند دنوں سے بارشوں کے سلسلے میں گھِرے ہوئے ہیں۔
ویڈیو دیکھنے کےلئے لنک کر کلک کریں:
https://x.com/i/status/1989579688813969421
بارش کے باعث حدِ نگاہ کم ہونے پر سعودی جنرل ڈائریکٹوریٹ آف ٹریفک نے ڈرائیوروں سے اپیل کی ہے کہ وہ محتاط ڈرائیونگ اختیار کریں، تیز رفتاری سے پرہیز کریں اور گاڑیوں کے درمیان مناسب فاصلہ برقرار رکھیں۔ اس کے ساتھ سعودی نیشنل سینٹر آف میٹیورولوجی نے مزید بارشوں اور ممکنہ شدید موسمی حالات کے حوالے سے انتباہ بھی جاری کیا ہے۔
ویڈیو دیکھنے کےلئے لنک کر کلک کریں:
https://x.com/i/status/1989653028874633291
واضح رہے کہ جمعرات کے روز پورے سعودی عرب میں نمازِ استسقاء ادا کی گئی تھی، جو شاہ سلمان بن عبدالعزیز کے حکم پر منعقد ہوئی۔ خطے کے دیگر ممالک، خصوصاً کویت اور قطر میں بھی اسی نوعیت کی دعائیں کی گئیں۔
