حیدرآباد (دکن فائلز ویب ڈیسک) شام کے صوبے حمص میں ایک علوی اکثریتی علاقہ کی مسجد میں جمعہ کی نماز کے دوران دھماکا ہوا، جس کے نتیجے میں متعدد افراد جاں بحق اور پانچ زخمی ہو گئےجبکہ بعض اطلاعات میں مرنے والوں کی تعداد 5 سے زائد بتائی گئی۔
مقامی حکام کے مطابق دھماکہ نماز کے دوران پیش آیا۔ زخمیوں کو فوری طور پر قریبی اسپتال منتقل کیا گیا، جہاں بعض کی حالت تشویشناک بتائی جا رہی ہے۔ شامی میڈیا کے مطابق سکیورٹی فورسز نے واقعہ کے فوراً بعد مسجد اور اس کے گردونواح کو گھیرے میں لے کر تحقیقات شروع کر دی ہیں۔
حکام کا کہنا ہے کہ دھماکے کی نوعیت اور اس کے محرکات کا تعین کیا جا رہا ہے۔ ابتدائی معلومات کے مطابق دھماکہ خودکش حملہ آور کی کارروائی یا مسجد میں پہلے سے نصب کیے گئے دھماکہ خیز مواد کے باعث ہو سکتا ہے، تاہم حتمی تصدیق تحقیقات مکمل ہونے کے بعد ہی کی جائے گی۔
تاحال کسی بھی گروہ نے دھماکے کی ذمہ داری قبول نہیں کی ہے، جبکہ سکیورٹی ادارے مختلف پہلوؤں سے واقعہ کی تفتیش کر رہے ہیں۔
