پاکستان میں امیرِ تبلیغی جماعت و جید عالم دین حضرت مولانا نذرالرحمانؒ کا انتقال: عالمِ اسلام کا عظیم علمی و روحانی سانحہ (ویڈیو دیکھیں)

حیدرآباد (دکن فائلز) تبلیغی جماعت کے امیر اور برصغیر کے ممتاز و جید عالمِ دین حضرت مولانا نذرالرحمان صاحبؒ طویل علالت کے بعد پیر 16 نومبر کو اس دارِ فانی سے کوچ کر گئے۔ اِنَّا لِلّٰہِ وَاِنَّآ اِلَیْہِ رَاجِعُوْن۔ ان کی رحلت کی خبر سے پاکستان سمیت دنیا بھر کے دینی، علمی اور تبلیغی حلقوں میں گہرے رنج و غم کی لہر دوڑ گئی ہے۔

مرحوم کی نمازِ جنازہ پاکستان میں تبلیغی جماعت کے مرکزی اجتماع گاہ کے وسیع میدان میں ادا کی گئی۔ اپنے محبوب بزرگ اور روحانی پیشوا کے آخری دیدار اور نمازِ جنازہ میں شرکت کے لیے ملک بھر سے علمائے کرام، مشائخ، طلبہ اور عقیدت مندوں کا ایک جمِ غفیر امڈ آیا، جہاں رقت آمیز مناظر کے درمیان انہیں آہوں اور سسکیوں کے ساتھ سپردِ خاک کیا گیا۔

ویڈیو دیکھنے کےلئے لنک پر کلک کریں:
https://www.instagram.com/p/Df1CWFjDLFr/?utm_source=ig_embed&utm_campaign=embed_video_watch_again

حضرت مولانا نذرالرحمانؒ کے انتقال پر پاکستان، ہندوستان کے علاوہ دنیا بھر کے اکابر علمائے کرام اور سرکردہ سماجی و سیاسی شخصیات نے گہرے دکھ اور افسوس کا اظہار کیا ہے۔ معروف اسلامی اسکالر مولانا طارق جمیل نے حضرت مولانا نذرالرحمانؒ کو اپنا استادِ محترم قرار دیتے ہوئے ان کی وفات پر انتہائی رنج و غم کا اظہار کیا۔ اپنے تعزیتی بیان میں انہوں نے کہا کہ آج امتِ مسلمہ ایک عظیم دینی اور روحانی شخصیت سے محروم ہو گئی ہے۔ انہوں نے بارگاہِ الٰہی میں دعا کی کہ اللہ تعالیٰ مرحوم کی مغفرت فرمائے اور انہیں جنت الفردوس میں اعلیٰ ترین مقام عطا فرمائے۔

ویڈیو دیکھنے کےلئے لنک پر کلک کریں:
https://www.instagram.com/darsequran1/reel/Df06zGPABo2/

حضرت مولانا نذرالرحمانؒ کو نومبر 2018 میں تبلیغی جماعت کا امیر مقرر کیا گیا تھا۔ آپ 1970 سے تبلیغی جماعت کے عالمی مرکز رائے ونڈ میں مقیم تھے اور اپنی زندگی کی پانچ دہائیوں سے زائد عرصہ دینی تعلیم، روحانی تربیت اور دعوت و تبلیغ کے لیے وقف کیے رکھا۔ آپ علمِ حدیث کے ایک نہایت معتبر اور جید عالم تھے، جنہوں نے طویل عرصے تک استاد الحدیث کی حیثیت سے خدمات سرانجام دیں اور ہزاروں علما و طلبہ کی علمی و روحانی تربیت فرمائی۔ مزید برآں، آپ معروف بزرگ حضرت مولانا خواجہ خان محمدؒ کے مجازِ بیعت (خلیفہ) بھی تھے۔

اپنا تبصرہ بھیجیں