حیدرآباد (دکن فائلز) ساری دنیا میں ہندوستان کو سیکولر ملک تصور کیا جاتا ہے اور اسے عزت و وقار کی نظر سے دیکھا جاتا ہے جبکہ آر ایس ایس چیف موہن بھاگوت بار بار ہندوستان کو ہندو راشٹر قرار دیتے رہے ہیں۔ اب تازہ طور پر انہوں نے ایک بار پھر ہندوستان کو ہندو راشٹر قرار دیا اور کہا کہ تمام ہندوستانی ہندو ہیں۔
آر ایس ایس کے سرسنگھ چالک موہن بھاگوت نے کہا ہے کہ نظریاتی طور پر تمام ہندوستانی ہندو ہیں، کچھ لوگ سمجھ گئے ہیں اور کچھ لوگ سمجھنے کے بعد بھی جاہل ہیں۔ ناگپور میں ایک تقریب سے خطاب کرتے ہوئے، سنگھ کے سربراہ موہن بھاگوت نے نتن گڈکری اور دیویندر فڈنویس کی موجودگی میں کہاکہ ‘ہندوستان ایک ہندو قوم ہے، یہ سچ ہے، آر ایس ایس یہ کرے گی، ہر کوئی یہی توقع رکھتا ہے، اس میں کوئی اعتراض نہیں ہے لیکن تمام ہندوستانیوں کی فکر کریں، نظریاتی طور پر تمام ہندوستانی ہندو ہیں۔’
انہوں نے کہا کہ ‘ہر کسی کا تعلق ہندو ثقافت، ہندو آبا و اجداد اور ہندو زمین سے ہے، کسی اور سے نہیں، کچھ لوگوں نے یہ بات سمجھ لی ہے، کچھ لوگ سمجھنے کے بعد بھی لاعلم رہتے ہیں اور کچھ لوگ خود غرضی کی وجہ سے سمجھنا نہیں چاہتے۔ ‘کچھ لوگ یہ بھول گئے ہیں، لوگوں کا ماننا ہے کہ آر ایس ایس کو ہندوؤں اور ہر چیز کا خیال ہے۔
