حیدرآباد (دکن فائلز): سوشل میڈیا پر ایک ویڈیو وائرل ہوگئی ہے جس میں ایک ہندوتوا تنظیم کے ارکان کو رشی کیش کے امیت گرام علاقہ میں ہتھوڑے اور جے سی بی کی مدد سے دو مزار ڈھاتے ہوئے دیکھا جاسکتا ہے۔ ویڈیو میں دو نوجوان ’جئے شری رام‘ کے نعرے لگاتے ہوئے مزارات کو منہدم کررہے ہیں۔ وہیں ایک جے سی بی کو مزار کا توڑا گیا ملبہ ہٹاتے ہوئے دیکھا جاسکتا ہے۔ اس دوران ایک شدت پسند کو یہ کہتے ہوئے بھی سنا جاسکتا ہے کہ ’ایسے سارے غیرقانوی مزار ہٹادیئے جائیں گے، یہ دیو بھومی ہے، مزار بھومی نہیں‘۔
اتراکھنڈ کے رشی کیش میں دیو بھومی رکھشا ابھیان تنظیم کے ارکان کی جانب سے مبینہ طور پر دو مزارات کو منہدم کرنے کا ویڈیو سوشل میڈیا پر وائر ہوگیا۔ جسے صارفین نے انتہائی شدت پسندانہ و منافرت پر مبنی جرم سے تعبیر کیا۔
میڈیا رپورٹ کے مطابق اتراکھنڈ پولیس نے مذہبی جذبات کو ٹھیس پہنچانے کے الزام میں نامعلوم افراد کے خلاف ایف آئی آر درج کی ہے لیکن ابھی تک اس معاملہ میں کسی کو گرفتار نہیں کیا گیا۔ پولیس کی جانب سے بتایا گیا کہ وہ ویڈیو میں نظر آنے والے ملزمین کی شناخت میں مصروف ہے۔
