حیدرآباد (دکن فائلز) آسام میں ایک دل دہلادینے والا واقعہ پیش آیا۔ آسام کے تینسوکیا ضلع کی ایک مسجد میں فجر کی نماز پڑھارہے امام پر چاقو سے حملہ کرکے ہلاک کردیا۔ آسام ٹریبیون کے مطابق مکوم کالاباری علاقے کی مسجد کے 55 سالہ امام مولانا تہذیب السلام کو بحالت نماز چاقو سے حملہ کرکے قتل کردیا۔ ایک مصلی نے حملہ آور کو روکنے کی کوشش کی تاہم وہ حملہ کرکے فرار ہوگیا۔
میڈیا رپورٹس کے مطابق پولیس نے ملزم کو گرفتار کرلیا جبکہ حملہ آور کی شناخت 42 سالہ مقامی شخص محمد ابراہیم احمد کے طور پر کی گئی۔ پولیس کے مطاق مولانا تہذیب السلام اور محمد ابراہیم احمد کے درمیان کچھ روز قبل بحث و تکرار ہوئی تھی۔
پولیس کی جانب سے بتائی گئیں تفصیلات کے مطابق محمد ابراہیم احمد فحر کی نماز کے دوران چاقو کے ساتھ مسجد میں داخل ہوا اور مولانا تہذیب السلام پر جو نماز کی امامت کررہے تھے چاقو سے حملہ کرکے متعدد وار کئے۔ شدید حملہ میں مولانا موقع پر ہی جاں بحق ہوگئے۔ ملزم موقع پر فرار ہوگیا، جسے بعد میں گرفتار کرلیا گیا۔ ملزم کے خلاف قتل کا مقدمہ درج کرلیا گیا۔
مقامی افراد نے بتایا کہ جب مولانا کی ابراہیم سے بحث ہوئی تو مسجد کے مصلیوں نے انہیں پولیس میں شکایت کرنے کا مشورہ دیا تھا لیکن مولانا تہذیب السلام نے ایسا کرنے سے انکار کردیا اور کہا تھا کہ ’اللہ میری حفاظت کرے گا‘۔ پولیس نے بتایا کہ اس معاملہ میں مزید تحقیقات کی جارہی ہیں۔
