حیدرآباد (دکن فائلز) چین میں نمونیا کی طرح سانس لینے میں تکلیف کی نئی بیماری کے معاملوں میں گزشتہ چند دنوں میں حیرت انگیز اضافہ ہوا ہے۔ چین میں سانس لینے میں تکلیف سے متعلق نئی بیماری کی وبا تیزی سے پھیل رہی ہے۔ وبا میں شدت کے اندیشوں کے بیچ ہندوستان میں بھی مرکزی حکومت نے مستعدی کا مظاہرہ کرتے ہوئے تمام ریاستوں اور مرکز کے زیر انتظام علاقوں کو ایڈوائزری جاری کی ہے۔
حکومت نے اس طرح کی وبا سے نمٹنے کیلئے تیاریوں کا جائزہ لینے کی ہدایت دی ہے۔ اس کے ساتھ ہی ریاستی حکومتوں کو مشورہ دیا ہے کہ وہ عوامی نظام صحت کو چاق و چوبند بنائیں تاکہ ضرورت پڑنے پر وہ تنفس سے متعلق بیماریوں سے نمٹنے کا اہل ہو۔
ایڈوائزری میں کہا گیاکہ ہندوستان پڑوسی ملک کی طبی صورتحال پر نگاہ رکھے ہوئے ہے، ’فی الحال فکرمند ہونے کی کوئی ضرورت نہیں ہے‘۔ مرکزی وزارت داخلہ کے سیکریٹری کی جانب سے جاری کی گئی ایڈوائزری میں ریاستوں کو ہدایت دی گئی ہے کہ وہ میڈیکل انفرااسٹرکچر پر توجہ دیں، اسپتالوں میں بستر، دواؤں ، انفلوئنزا کے ٹیکوں ، آکسیجن کی فراہمی ، اینٹی بائیوٹکس کی دستیابی، طبی ٹیسٹ کے لوازمات اور طبی عملے کیلئے حفاظتی کپڑوں کی دسیتابی کو یقینی بنائیں۔ اس کے ساتھ ہی آکسیجن پیدا کرنے والے پلانٹس، وینٹی لیٹرس اور اسپتالوں میں انفیکشن کے پھیلاؤ کو روکنے کی تدابیر کو مستحکم کرنے کا مشورہ دیاگیا ہے۔
