حیدرآباد (دکن فائلز) کل ہند مجلس اتحاد المسلمین کے امیدوار سید امتیاز جلیل حلقہ اورنگ آباد ایسٹ سے صرف 2161 ووٹوں سے ہار گئے۔ اورنگ آباد ایسٹ حلقہ سے بی جے پی امیدوار اتل موریشاور سیو نے کامیابی حاصل کی۔ دلچسپ بات یہ ہے کہ اسی حلقہ سے دیگر پارٹیوں سے وابستہ مسلم امیدواروں کو ہزاروں ووٹ حاصل ہوئے جبکہ ایسا مانا جارہا ہے کہ دیگر مسلم امیدواروں کی وجہ سے ووٹ کٹے اور امتیاز جلیل کچھ ہی ووٹوں سے ہار گئے۔
ونچت بہوجن اگاڈی کے افسر خان نے 6 ہزار 500 سے زائد ووٹ حاصل کئے جبکہ سماج وادی پارٹی کے امیدوار عبدالغفار قادری نے تقریباً 6 ہزار ووٹ حاصل کئے۔ امتیاز جلیل کو کل 91 ہزار 113 ووٹ حاصل ہوئے۔ بی جے پی امیدوار نے 93 ہزار 274 ووٹ ملے۔
کل ہند مجلس اتحاد المسلمین نے مہاراشٹر اسمبلی انتخابات میں 16 امیدواروں کو میدان میں اتارا تھا۔ مالیگاؤں سینٹرل سے موجودہ ایم ایل اے مفتی اسماعیل قاسمی، دھولے سے فاروق شاہ انور اور اورنگ آباد ایسٹ سے سابق ایم پی سید امتیاز جلیل، ممبئی پارٹی کے سربراہ رئیس لشکریہ کو ورسووا سے، بائیکلہ کے سابق ایم ایل اے وارث پٹھان کو بھیونڈی، ممبئی کے سابق سربراہ فیاض احمد خان کو بائیکلہ، ببیتا کناڈے کرلہ، عتیق احمد خان کو مانکھرد شیواجی نگر سے، مہاراشٹر کے نائب صدر سید معین ناندیڑ ساؤتھ، پارٹی کی خواتین ونگ کی جنرل سکریٹری کیرتی دیپک ڈونگرے ناگپور نارتھ، ناصر صدیقی کو چھترپتی سمبھاجی نگر سینٹرل، سیف پٹھان کو ممبرا کلوا، فاروق شبدی کو سولاپور، مہیش کامبلے کو مراج، سمرت سوروادے کو مرتضیٰ پور اور محمد یوسف کو کرنجا منوڑہ سے مجلس نے اپنا امیدوار بنایا تھا۔
