حیدرآباد (دکن فائلز) مرکزی وزیر اور بی جے پی لیڈر بندی سنجے نے بی آر ایس کے ورکنگ صدر کے ٹی آر پر سنسنی خیز الزامات لگائے ہیں۔ انہوں نے کہا کہ سابق ایم ایل اے مگنتی گوپی ناتھ کی موت کے لئے کے ٹی آر ذمہ دار ہیں اور خود گوپی ناتھ کی والدہ نے یہ بات کہی تھی۔ انہوں نے کہا کہ اگر چیف منسٹر ریونت ریڈی میں ہمت ہے تو اس واقعہ کی مکمل تحقیقات کرائی جائے اور اگر کے ٹی آر پر تھرڈ ڈگری کا اطلاق ہوتا ہے تو اصل حقیقت سامنے آجائے گی۔ انہوں نے یہ سخت تبصرے جوبلی ہلز ضمنی انتخابات کے سلسلہ میں بی جے پی امیدوار کےلئے انتخابی مہم کے دوران کل رات بورابنڈہ میں منعقدہ روڈ شو کے دوران کئے۔
اس موقع پر خطاب کرتے ہوئے بندی سنجے نے کے سی آر اور کے ٹی آر کے ساتھ ساتھ سی ایم ریونت ریڈی کو نشانہ بنایا۔ انہوں نے کہا کہ “اگر کے سی آر احمق ہیں تو ان کا بیٹا اس سے بھی بڑا بے وقوف ہے۔ کے ٹی آر نہیں چاہتے کہ کے سی آر دوبارہ سی ایم بنیں۔ کے ٹی آر صرف سی ایم کے تخت پر بیٹھنے کےلئے بے چین ہیں۔ وہ عہدہ کے لئے کچھ بھی کرسکتے ہیں۔ انہوں نے کویتا کو مشورہ دیا کہ بیٹیاں اپنے والدین کا اچھی طرح خیال رکھتی ہیں اور ان کے والد کو ان کا خیال رکھنا چاہیے۔
بعد ازاں انہوں نے کانگریس حکومت کو بھی شدید تنقید کا نشانہ بنایا اور سی ایم ریونت ریڈی پر بھی انتہائی سنگین الزامات عائد کئے۔ انہوں نے بالواسطہ طور پر ریونت ریڈی کی حکمرانی پر سنگین تبصرہ کیا۔ انہوں نے الزام لگایا کہ ریونت اور کے سی آر ایک ہی ہیں اور انہوں نے مل کر لاکھوں کروڑوں کی کمائی کی ہے۔
بندی سنجے نے اپنی روایت کو برقرار رکھتے ہوئے مجلس پر بھی حملہ کیا۔ انہوں نے کہا کہ “اگر کانگریس جوبلی ہلز میں جیت جاتی ہے تو ایسا لگتا ہے جیسے مجلس جیت گئی ہے۔ اگر وہ جیت گئی تو لوگ بھکاری بن جائیں گے۔ یہاں تک کہ خواتین کے گلے میں منگل سوتر کو بھی چھین لیا جائے گا۔” ریونت کے ٹوپی پہننے پر رد عمل ظاہر کرتے ہوئے انہوں نے کہا کہ “میں ایک ہندو ہوں۔ میں ٹوپی پہن کر جھوٹی نماز نہیں پڑھوں گا جب تک کہ میں اپنا سر نہ کٹوا دوں۔ میں دوسرے مذاہب کی توہین نہیں کروں گا۔” انہوں نے ایک بار پھر کہا کہ ان کا مقصد چارمینار پر زعفرانی پرچم لہرانا ہے۔
