حیدرآباد (دکن فائلز) دہلی میں 10 نومبر کو لال قلعہ کے قریب مبینہ طور پر کار دھماکہ کے ملزم ڈاکٹر عمر نبی کا ایک مبینہ ویڈیو سوشل میڈیا پر وائرل ہورہا ہے، جس میں انہیں خودکش حملہ کی تائید و حمایت کرتے دکھایا گیا۔
لال قلعہ دھماکہ سے قبل مبینہ طور پر عمر نبی نے ایک ویڈیو ریکارڈ کی، جس میں انہیں خودکش حملے کے تصور کے بارے میں عجیب و غریب دعوے کرتے دکھایا گیا۔ مشتبہ ویڈیو میں عمر نبی کو یہ کہتے ہوئے سنا جاسکتا ہے کہ ’ایک خودکش حملہ، جسے معاشرہ غلط سمجھتا ہے، دراصل اسلام میں ایک “شہادت کی کارروائی” ہے۔
ویڈیو میں مبینہ طور پر عمر نبی یہ کہہ رہے ہیں کہ “خودکش حملوں کے خلاف بہت سے دلائل ہیں، لیکن شہادت کا عمل اس وقت ہوتا ہے جب کوئی شخص موت کی فطری توقعات کے خلاف جاتا ہے، یہ جانتے ہوئے کہ وہ ایک خاص جگہ اور وقت پر مرے گا۔” ویڈیو میں عمر کو مبہم انداز میں خودکش حملہ کی حمایت کرتے دیکھا گیا۔
تفتیش کاروں کا ماننا ہے کہ عمر انتہا پسند نظریہ کے حامل فرید آباد دہشت گردی کے ماڈیول کا رکن تھا۔ حکام کو شبہ ہے کہ یہ ویڈیو نوجوانوں کو گمراہ کرنے اور برین واش کرنے کی نیت سے بنائی گئی تھی۔
