حیدرآباد (دکن فائلز) راشٹریہ سویم سیوک سنگھ (آر ایس ایس) کے سربراہ موہن بھاگوت نے منی پور کے دورے کے دوران ایک عوامی جلسے سے خطاب کرتے ہوئے انتہائی اہم اور متنازعہ بیان دیا۔ انہوں نے کہا کہ ’’ہندوؤں کے بغیر دنیا کا وجود ہی ممکن نہیں‘‘ اور یہ کہ عالمی بقا کے لیے ہندو سماج کا ہونا ناگزیر ہے۔
موہن بھاگوت نے اپنی تقریر میں قدیم تہذیبوں کا حوالہ دیتے ہوئے کہا کہ یونان، مصر اور روم جیسی عظیم تہذیبیں مٹ گئیں، لیکن بھارتی تہذیب آج بھی قائم ہے۔ ان کے مطابق بھارتی تہذیب کی بقا اس بات کی نشاندہی کرتی ہے کہ اس میں کوئی خاص خصوصیت موجود ہے، جس نے اسے ہزاروں سالوں تک محفوظ رکھا۔
انہوں نے مزید کہا کہ بھارت ایک ایسی تہذیب کا نام ہے جس کی کوئی انتہا نہیں، اور ہندو سماج نے ہمیشہ ایک مضبوط معاشرتی نظام تشکیل دیا ہے۔ ان کے مطابق اسی مضبوط بنیاد کے سبب ہندو سماج ہمیشہ سے قائم رہا ہے اور مستقبل میں بھی قائم رہے گا۔
موہن بھاگوت نے دعویٰ کیا کہ ’’اگر ہندو اپنا وجود کھو دیں تو دنیا بھی اپنا وجود کھو دے گی، کیونکہ دنیا کی بقا ہندو سماج سے جڑی ہوئی ہے‘‘۔ ان کے یہ بیانات سوشل میڈیا پر تیزی سے وائرل ہو رہے ہیں اور مختلف حلقوں میں بحث کا موضوع بنے ہوئے ہیں۔
