حیدرآباد (دکن فائلز) جمعیۃ علماء جھارکھنڈ کے زیرِ اہتمام معہدالقرآن مدنی مسجد نوادہ ہزاری باغ میں تحفظِ ختمِ نبوت کے موضوع پر عظیم الشان نمائندہ اجلاس منعقد ہوا، جس کی صدارت مولانا حبیب الرحمن قاسمی نے کی۔ اجلاس کے مہمانانِ خصوصی میں حضرت مولانا سید اسجد مدنی (نائب صدر جمعیۃ علماء ہند)، حضرت شاہ عالم گورکھپوری (مجلسِ تحفظ ختمِ نبوت دارالعلوم دیوبند) اور حضرت مولانا سید حسن اسجد مدنی شامل تھے۔
اجلاس میں 16 اضلاع سے آئے ہوئے تقریباً پانچ سو علماء، ذمے دارانِ مدارس، ائمہ، دانشوروں اور سماجی کارکنوں نے شرکت کی۔ یہ اجلاس صوبے میں فرقِ باطلہ کی سرگرمیوں کے خلاف منظم حکمتِ عملی بنانے کے لیے نہایت اہم قرار دیا جا رہا ہے۔
مقررین نے ختمِ نبوت کی عقیدتی اہمیت بیان کرتے ہوئے کہا کہ یہ ایمان کی بنیاد اور امت کا اجتماعی عقیدہ ہے اور اس کے تحفظ کے لیے ہر دور میں قربانیاں دی گئی ہیں۔ علما نے اتحاد، آگاہی اور مسلکی بصیرت کی ضرورت پر زور دیتے ہوئے اس عہد کا اعادہ کیا کہ ختمِ نبوت کے خلاف اٹھنے والی ہر آواز کا علمی، قانونی اور روحانی سطح پر بھرپور جواب دیا جائے گا۔ علمائے کرام نے ملت کے ہر فرد سے تحفظِ ختم نبوت کے علمبردار بننے کی اپیل کی۔
