وارانسی کی ایک عدالت نے آج انجمن مسجد کمیٹی کی درخواست کو مسترد کر دیا جس کہا گیا تھا کہ گیانواپی مسجد کے احاطے کا قبضہ بھگوان وشویشور وراجمان کو سونپنے سے متعلق عرضی جس میں ٹائٹل سوٹ کی برقراری کو چیلنج کیا گیا تھا کو خارج کرنے کا مطالبہ کیا گیا تھا۔
مسلم فریق کی درخواست کو مسترد کرتے ہوئے، فاسٹ ٹریک کورٹ کے معزز جج مہیندر کمار پانڈے نے کیس کی مزید سماعت کو 2 دسمبر تک ملتوی کردیا۔ عدالت نے 27 اکتوبر کو اس معاملے پر فیصلہ محفوظ کیا تھا۔
واضح رہے کہ ہندو فریق نے مسجد احاطہ میں ملے مبینہ شیولنگ کی پوجا کی اجازت مانگی ہے۔ عدالت پہلے اس عرضی پر 14 نومبر کو فیصلہ سنانے والی تھی، لیکن اس دن سول جج مہندر پانڈے نے اسے 17 نومبر تک کے لیے ملتوی کر دیا تھا۔
قابل ذکر ہے کہ وشو ویدک سناتن سنگھ کے جنرل سکریٹری عرضی دہندہ کرن سنگھ نے 24 مئی کو وارانسی ضلع عدالت میں مقدمہ داخل کر گیان واپی احاطہ میں مسلمانوں کے داخلے پر روک لگانے، احاطہ کو سناتن سنگھ کو سونپنے اور شیولنگ کی پوجا کرنے کے لیے اجازت دینے کا مطالبہ کیا تھا۔ دوسری طرف مسلم فریق کے وکیل نے کہا کہ عدالت کے ذریعہ معاملے کو خارج کر دیا جائے گا۔ ضلع عدالت میں پہلے کا معاملہ مسجد کی باہری دیوار پر واقع ہندو دیوی دیوتاؤں کی مورتیوں کی روزانہ پوجا کی اجازت سے متعلق تھا، جبکہ چل رہا معاملہ مسجد کے اندر والے حصے سے جڑا ہے۔
