مسلم راشٹریہ منچ نے یکساں سول کوڈ کی حمایت میں کشمیر سے کنیاکماری تک مہم چلانے کا اعلان کیا۔۔۔ لیکن کسی بھی مسلم تنظیم کی جانب سے یو سی سی کی مخالفت میں عوامی مہم چلانے کا اب تک کوئی اعلان نہیں کیاگیا!

آر ایس ایس کی ذیلی تنظیم مسلم راشٹریہ منچ نے ایک ملک، ایک لوگ، ایک قانون یعنی کامن سول کوڈ کے لیے پورے ملک میں بڑے پیمانہ پر مہم چلانے کا اعلان کیا ہے۔ اس کے لیے منچ کے کارکنان پورے ملک میں عوامی مہم چلائیں گے۔ ایک اجلاس میں اس بات کا فیصلہ کیا گیا کہ منچ کے کارکنان کا گروپ ملک بھر کے لاکھوں خاندانوں تک پہنچ کر ہم آہنگی، ہم آہنگی، بھائی چارہ، اتحاد، سالمیت کے لیے بھرپور کوشش کرتے ہوئے ایک مضبوط اور خوش حال ملک کے لیے یکساں سول کوڈ کی ضرورت بتائے گا۔
منچ کے میڈیا انچارج شاہد سعید نے بتایا کہ اسی سلسلے میں نئی دہلی میں چیف سرپرست اندریش کمار کی صدارت میں ایک اہم میٹنگ ہوئی۔ اجلاس میں متفقہ طور پر منظور کیا گیا کہ یکساں سول کوڈ کسی بھی طرح اسلام اور مسلم دشمن نہیں ہے۔ سنگھ لیڈر اندریش کمار کے علاوہ اس میٹنگ میں محمد افضل، شاہد اختر، گریش جویال، طاہر عباس، ایس کے مدین، ابوبکر نقوی، ویراگ پچپور، اسلام عباس، ماجد تلی کوٹی، رضا حسین رضوی، عرفان علی، شالینی علی، ریشم حسین، شہناز، افضل، خورشید رضا، شیراز قریشی، فیض خان، بلال الرحمان، فاروق خان، التمش بہاری کے علاوہ دیگر 400 سے زائد کارکن موجود تھے۔
واضح رہے کہ لا کمیشن کی جانب سے ملک میں یکساں سول کوڈ کے نفاذ کےلئے لوگوں اور تنظیموں سے رائے طلب کی ہے جس کےلئے کمیشن نے صرف 30 دن کی مہلت دی گئی ہے۔ کمیشن نے 4 روز قبل اس کا اعلان کیا تاہم اب صرف تقریباً 25 دن ہی باقی رہ گئے ہیں۔
ان سب کے باوجود اب تک کسی بھی مسلم پارٹی یا تنظیم نے اس مسئلہ پر کوئی بڑا اعلان نہیں کیا ہے۔ اس حساس مسئلہ پر آج تک کسی مسلم جماعت کی جانب سے ملک گیر سطح پر کوئی عوامی بیداری مہم چلانے کی بات نہیں کی گئی لیکن آر ایس ایس اس مسئلہ پر متحرک ہے۔