حیدرآباد (پریس نوٹ) شعبۂ خواتین جماعت اسلامی ہند، چندرائن گٹہ کی جانب سے “حقوقِ ہمسایہ” مہم کے تحت دو اہم پروگرام منعقد ہوئے جن میں خواتین و طالبات نے بھرپور شرکت کی۔ اجتماع عام برائے خواتین مورخہ 27 نومبر 2025 کو اسلامک سینٹر مسجد ذوالجلال چندرائن گٹہ میں منعقد ہوا جس میں سو سے زائد خواتین نے شرکت کی۔
اس اجتماع کی صدارت محترمہ ظہیر فاطمہ صاحبہ ، رکن مرکزی مجلس نمائندگان نے فرمائی۔ پروگرام کا آغاز محترمہ فرقانہ صاحبہ (کارکن گلشن اقبال ڈویژن) کی تذکیر بالقرآن سے ہوا۔ افتتاحی کلمات محترمہ سمیّہ امتہ الرزاق صاحبہ (ناظمہ، شعبۂ خواتین چندرائن گٹہ) نے پیش کیے اور “حقوقِ ہمسایہ” مہم کی اہمیت واضح کی۔
محترمہ امۃ القوی نفیسہ صاحبہ (رکن جماعت، بابانگر) نے نہایت دلنشین حمد پیش کی۔ بابانگر کی ارکان حمیرہ صاحبہ، افشاں صاحبہ اور صالحہ صاحبہ نے قرآن و حدیث کی روشنی میں حقوقِ ہمسایہ پر ایک علمی مکالمہ پیش کیا۔ محترمہ رحمت النسا (کارکن) نے ترانہ پیش کیا۔
بعد ازاں گلشن اقبال کالونی کی کارکنان شہناز بیگم، عشرت عائشہ، آمنہ بیگم، قدسیہ سلطانہ اور ام سلمہ نے حقوقِ ہمسایہ پر مبنی ایک مؤثر ڈرامہ پیش کیا۔ صدارتی خطاب میں محترمہ ظہیر فاطمہ صاحبہ نے سیرت، احادیث اور قرآن کی روشنی میں ہمسایہ حقوق کی اہمیت پر جامع گفتگو کی۔
اظہارِ تشکر محترمہ سعیدہ بیگم صاحبہ (معاون ناظمہ، چندرائن گٹہ) نے پیش کیا۔ اختتام سے قبل دو بہنوں نے احادیث کی روشنی میں ماڈل پریزنٹ کیا اور دعا پر اجتماع اختتام پذیر ہوا۔ اسکے علاوہ ادبی اجلاس برائے خواتین مورخہ 24 نومبر 2025 کو اسلامک سینٹر مسجد ذوالجلال گلشن اقبال کالونی چندرائن گٹہ میں منعقد ہوا جس میں تقریباً سو خواتین اور 10 طالبات نے شرکت کی۔
ادبی اجلاس کی صدارت محترمہ ناصرہ خانم صاحبہ (رکن مرکزی مجلس نمائندگان) نے کی جبکہ نگرانی محترمہ زبیدہ بیگم صاحبہ (سالارِ قافلہ، ادارہ ادب اسلامی حیدرآباد) نے انجام دی۔ اجلاس کا آغاز ھما صاحبہ (کارکن، گلشن اقبال) کی تلاوتِ قرآن سے ہوا۔افتتاحی کلمات محترمہ سعیدہ بیگم صاحبہ (معاون ناظمہ، چندرائن گٹہ) نے پیش کیے جبکہ محترمہ سمیّہ امتہ الرزاق صاحبہ (ناظمہ شعبہ خواتین چندرائن گٹہ) نے حمد پیش کی۔ نعت، ترانہ اور منتخب ادبی کلام کے ذریعے حقوقِ ہمسایہ کے پیغام کو دلوں میں اتارا گیا۔
اس ادبی اجلاس میں محترمہ زبیدہ بیگم، محترمہ شیما سعدیہ، محترمہ افشاں، محترمہ طیبہ اور رحمت صاحبہ نے اپنا خود کا تخلیقی کلام پیش کیا جبکہ دیگر کارکنان و ارکان نے پڑوسیوں کے حقوق، ہمدردی اور اسلامی معاشرت پر مبنی شاعری، افسانے اور ادبی تخلیقات پیش کیں۔ اختتامی کلمات محترمہ ناصرہ خانم صاحبہ نے ادا کیے اور حقوقِ ہمسایہ کی عملی اہمیت پر زور دیا۔
محترمہ سمیّہ امتہ الرزاق صاحبہ کے اظہار تشکر کے ساتھ پروگرام اختتام کو پہنچا۔دونوں پروگرام فکری، ادبی ، سماجی اور اخلاقی شعور و تربیت کا حسین امتزاج ثابت ہوئے اور خواتین میں اسلامی معاشرت خصوصاً حقوقِ ہمسایہ کی آگہی کو مضبوط کیا۔ شعبۂ خواتین جماعت اسلامی ہند چندرائن گٹہ اللہ تعالیٰ سے دعاگو ہے کہ اس مہم کو قبول و ثمرآور بنائے اور معاشرے میں خیر، محبت اور باہمی احترام کی فضا قائم فرمائے۔
