حیدرآباد (دکن فائلز) تیلگو دیشم پارٹی (ٹی ڈی پی) کے سربراہ اور آندھرا پردیش کے سابق چیف منسٹر این چندرابابو نائیڈو کو آج بدعنوانی کے الزام میں گرفتار کرکے وجئے واڑہ منتقل کردیا گیا۔ آندھرا پردیش کے سابق وزیراعلیٰ چندربابونائیڈو کو سی آئی ڈی پولیس نے گرفتارکرلیاہے۔ انہیں ہنرمندی کے فروغ کے کارپوریشن سے متعلق گھوٹالے کے سلسلے میں گرفتار کیاگیاہے۔
ٹی ڈی پی سربراہ کو ان کے دور میں آندھرا پردیش اسٹیٹ اسکی ل ڈیولپمنٹ کارپوریشن میں 317 کروڑ کے مبینہ گھوٹالہ کے سلسلے میں گرفتار کیا گیا ہے۔ یہ ادارہ ٹی ڈی پی کے دور حکومت میں نوجوانوں کو ہنر کی تربیت فراہم کرنے کے لیے قائم کیا گیا تھا۔
نائیڈو کو آج علی الصبح آندھرا پردیش کے کرمنل انوسٹی گیشن ڈپارٹمنٹ کے افسران نے بڑے ڈرامے کے بعد حراست میں لے لیا۔ کل دیر رات، افسران نندیال میں ایک فنکشن ہال پہنچے اور مسٹر نائیڈو کو گرفتاری کا وارنٹ جاری کیا۔ تاہم، وہ اسے حراست میں نہیں لے سکے کیونکہ ٹی ڈی پی سربراہ کے حامیوں نے احتجاج کیا۔
پولیس اہلکاروں اور نائیڈو کے حامیوں کے درمیان معمولی جھڑپ بھی ہوئی۔ نائیڈو نے الزام لگایا کہ پولیس کے پاس کوئی ثبوت نہیں ہے۔ “مجھے دکھائیں کہ میرا نام کہاں ہے؟ بنیادی ثبوت کے بغیر مجھے کیسے گرفتار کر سکتے ہیں؟”
جب تلگودیشم کے حامیوں نے جھگڑے کے دوران پولیس سے سوالات کئے تو پولیس افسران کو یہ کہتے ہوئے سنا گیا کہ ان کے پاس ثبوت ہیں اور ریمانڈ رپورٹ میں سب کچھ ہے۔
