العربیہ اردو کی رپورٹ کے مطابق تل ابیب اور وسطی اسرائیل پر 7 اکتوبر کو جنگ کے آغاز کے بعد سے اب تک کا سب سے بڑا راکٹ داغا گیا ہے۔ غزہ کی پٹی سے تل ابیب اور وسطی اسرائیل کے شہروں کی طرف راکٹوں کی بوچھاڑ کی گئی ہے۔ اسرائیلی فوج نے پیر کی شام بتایا کہ تل ابیب اور اسرائیل کے وسطی علاقے میں میزائل وارننگ سائرن بجنا شروع ہوگئے ہیں۔
"الأكبر منذ بدء الحرب".. رشقة صاروخية على #تل_أبيب في ظل القصف الإسرائيلي المتواصل على القطاع#غزة#العربية pic.twitter.com/ZtjbwArDwL
— العربية (@AlArabiya) November 20, 2023
غزہ کی پٹی سے برسائے گئے اس بڑے راکٹ کے حوالے سے مزید تفصیلات واضح نہیں ہوئی ہیں۔ القسام بریگیڈز نے کہا کہ اس نے شہریوں کے قتل عام کے جواب میں وسطی اسرائیل میں تل ابیب پر راکٹوں سے بمباری کی۔
اسرائیلی نشریاتی ادارے نے بتایا کہ ہسپانوی دارالحکومت میڈرڈ سے آنے والے ایک اسرائیلی مسافر طیارے کو آج غزہ کی پٹی سے سائرن بجنے اور راکٹ فائر کیے جانے کے بعد تل ابیب کے بن گوریون ایئرپورٹ پر لینڈنگ منسوخ کرنا پڑی ہے۔ حکام نے بتایا کہ اسرائیلی ایئر لائنز ’’ ایل آل‘‘ کا طیارہ لینڈ کرنے ہی والا تھا کہ اس نے پھر اڑان بھر لی۔
اسرائیلی براڈکاسٹنگ کارپوریشن کی رپورٹ کے مطابق پیر کو غزہ کی پٹی سے سدیروت کی طرف کئی گولے فائر کیے گئے جس کے بعد شہر اور آس پاس کے متعدد مقامات پر سائرن بجنے لگے۔ گولہ باری کے نتیجے میں اسرائیلیوں میں کوئی جانی نقصان نہیں ہوا۔
