(ایجنسیز) ایرانی صدر ابراہیم رئیسی کے ہیلی کاپٹر حادثہ کی تحقیقات مکمل ہونے کے بعد وجوہات کا انکشاف کردیا گیا۔ میڈیا رپورٹس کے مطابق سکیورٹی ذرائع کا کہنا ہے کہ ابراہیم رئیسی کے ہیلی کاپٹر حادثہ کی تحقیقات مکمل ہوگئی ہیں اور تحقیقاتی رپورٹ میں حادثے کی دو وجوہات کا تعین کیا گیا ہے۔
ایرانی میڈیا کے مطابق حادثے کی پہلی وجہ موسم کی صورتحال کا سازگار نہ ہونا تھا۔ تحقیقاتی رپورٹ میں حادثے کی دوسری وجہ گنجائش سے زیادہ افراد کا ہیلی کاپٹر میں سوار ہونا تھا، ہیلی کاپٹر زیادہ وزن اٹھانے کے قابل نہیں تھا جس کی وجہ سے پہاڑ سے ٹکرایا۔
ایرانی میڈیا کے مطابق ہیلی کاپٹر میں سکیورٹی پروٹوکول کے دو اضافی افراد سوار تھے۔ ایران کے سابق صدر ابراہیم رئیسی 19 مئی کو دیگر ساتھیوں سمیت ہیلی کاپٹر حادثے میں جاں بحق ہوئے تھے۔
