حیدرآباد (دکن فائلز) حرمِ مقدس کے قرب و جوار میں واقع حرا کلچرل ڈسٹرکٹ کے ’’قرآن میوزیم‘‘ کو ایک عظیم اور تاریخی اعزاز حاصل ہوا ہے، جہاں دنیا کے سب سے بڑے قرآنِ کریم کے نسخہ کو باضابطہ طور پر گنیز بک آف ورلڈ ریکارڈ میں شامل کر لیا گیا ہے۔ یہ اعزاز نہ صرف قرآنِ مجید کی عظمت و رفعت کا عالمی اعتراف ہے بلکہ اسلامی تہذیب، فنِ خطاطی اور علمی ورثے کی درخشاں مثال بھی ہے۔
سعودی خبر رساں ایجنسی ایس پی اے کے مطابق اس عظیم الشان قرآنی نسخے میں 700 صفحات شامل ہیں، جبکہ اس کا حجم 312 سینٹی میٹر لمبا اور 220 سینٹی میٹر چوڑا ہے۔ اپنے غیر معمولی جسامت، نفیس کتابت اور فنی حسن کی بدولت یہ نسخہ تاریخِ اسلامی میں ایک منفرد مقام رکھتا ہے۔
یہ مقدس نسخہ دسویں صدی ہجری کے ایک نادر اور عظیم قرآنی نسخے کی طرز پر تیار کیا گیا ہے، جس کا اصل سائز 45×30 سینٹی میٹر تھا۔ اس میں سورتوں کی کتابت خطِ ثلث میں جبکہ سورۃ الفاتحہ کو نہایت نفاست کے ساتھ خطِ نسخ میں تحریر کیا گیا ہے، جو عربی خطاطی کی اعلیٰ روایت اور فنونِ اسلامی میں مہارت کا روشن مظہر ہے۔
نسخہ کی جلد سازی، گلڈنگ اور تزئین و آرائش اسلامی فنِ تعمیر اور اسلامی طرزِ تزئین کی خوبصورت جھلک پیش کرتی ہے۔ یہ نہ صرف ایک مقدس دینی ورثہ ہے بلکہ فنِ کتابت، خطاطی اور اسلامی جمالیات کا بھی بے مثال شاہکار ہے، جو دیکھنے والوں کے دلوں میں خشوع و خضوع کی کیفیت پیدا کر دیتا ہے۔
قابلِ ذکر ہے کہ قرآنِ کریم کا یہ قدیم اور نادر نسخہ سنہ 1300 ہجری (1883 عیسوی) میں وقف کیا گیا تھا اور اب تک شاہ عبدالعزیز کمپلیکس اوقاف لائبریری میں محفوظ رکھا گیا ہے، جہاں سے اسے تحقیق اور نمائش کے لیے قرآن میوزیم میں پیش کیا گیا ہے۔
قرآن میوزیم میں آنے والے زائرین اور محققین کو اس عظیم نسخے سمیت مختلف ادوار کے نادر قرآنی نسخوں کا مشاہدہ کرنے اور ان کی تاریخی، علمی اور ثقافتی اہمیت کو سمجھنے کا قیمتی موقع فراہم کیا جاتا ہے۔ میوزیم میں موجود یہ ذخیرہ قرآنِ مجید سے وابستہ علمی روایت کو نئی نسل تک منتقل کرنے کا ایک موثر ذریعہ بھی ہے۔
یہ تاریخی اقدام نہ صرف اسلامی ورثے کے تحفظ کا عملی اظہار ہے بلکہ جدید دور میں قرآنِ کریم کے علمی، تاریخی اور ثقافتی مقام کو اجاگر کرنے کی ایک شاندار کوشش بھی ہے، جو عالمی سطح پر اسلامی ثقافت، فنونِ اسلامی اور قرآنِ مجید کی عظمت و بڑائی کو روشن اور نمایاں کرتا ہے۔
