حیدرآباد (دکن فائلز) بالی ووڈ کے معروف اداکار عامر خان نے اپنی قریبی ساتھی گوری اسپریٹ کے ساتھ سادہ اور نجی تقریب میں شادی کر لی۔ یہ تقریب ممبئی کے باندرا میں واقع ان کی رہائش گاہ پر منعقد ہوئی، جس میں صرف قریبی رشتہ دار، دوست اور دونوں خاندانوں کے افراد شریک ہوئے۔
رپورٹس کے مطابق دونوں نے اسپیشل میرج ایکٹ کے تحت رجسٹرڈ شادی کی۔ تقریب میں غیر ضروری شان و شوکت سے گریز کیا گیا اور اسے خاندانی ماحول تک محدود رکھا گیا۔ عامر خان اور گوری اسپریٹ گزشتہ دو برس سے ایک دوسرے کے قریب تھے اور عامر خان اس سے قبل بھی عوامی طور پر اپنے تعلق کا اعتراف کر چکے تھے۔
یہ عامر خان کی تیسری شادی ہے۔ اس سے قبل ان کی پہلی شادی رینا دتہ سے اور دوسری شادی فلم ساز کرن راؤ سے ہوئی تھی، تاہم دونوں شادیاں طلاق پر ختم ہوئیں۔ طلاق کے باوجود عامر خان نے اپنے سابقہ خاندانوں کے ساتھ خوشگوار تعلقات برقرار رکھے ہیں اور اپنے بچوں کی پرورش میں بھی فعال کردار ادا کرتے رہے ہیں۔
شادی کی تقریب میں عامر خان کے بچوں سمیت دونوں خاندانوں کے افراد موجود تھے۔ سوشل میڈیا پر تقریب کی ابتدائی تصاویر بھی سامنے آ چکی ہیں، جن میں عامر خان روایتی کریم رنگ کے لباس جبکہ گوری اسپریٹ ہلکے رنگ کے ملبوسات میں نظر آئیں۔
