حیدرآباد (دکن فائلز) امریکہ جانے کے خواہشمند افراد میں عموماً سب سے پہلے ایچ-1 بی ویزا کا نام آتا ہے، جو آئی ٹی ماہرین اور دیگر پیشہ ور افراد کے لیے مشہور ہے۔ تاہم بہت کم لوگوں کو یہ معلوم ہے کہ امریکہ میں مذہبی خدمات انجام دینے والوں کے لیے ایک مخصوص آر-1 ویزا بھی موجود ہے۔ اب امریکی حکومت نے اس ویزا سے متعلق ایک اہم اور فائدہ مند تبدیلی کا اعلان کیا ہے، جس سے مذہبی کارکنوں کو بڑی راحت ملی ہے۔
آر-1 ویزا کیا ہے؟
آر-1 ایک نان امیگرنٹ ویزا ہے، جو امریکہ میں چرچ، مندر، مسجد، سنیگاگ یا دیگر غیر منافع بخش مذہبی اداروں میں کام کرنے والے غیر ملکی مذہبی رہنماؤں اور کارکنوں کو جاری کیا جاتا ہے۔ پادری، پنڈت، ربی، امام، نن اور دیگر مذہبی خادمین اس کے اہل ہوتے ہیں۔ اس ویزا پر زیادہ سے زیادہ پانچ سال تک امریکہ میں قیام ممکن ہوتا ہے۔
اہم تبدیلی کیا کی گئی؟
اب تک آر-1 ویزا پر پانچ سال مکمل کرنے کے بعد ویزا ہولڈر کو لازمی طور پر اپنے ملک واپس جانا پڑتا تھا اور کم از کم ایک سال تک وہاں رہنا ہوتا تھا، جسے ’کولنگ آف پیریڈ‘ کہا جاتا تھا۔ اس شرط کے باعث کئی مذہبی اداروں، خاص طور پر تارکینِ وطن کی چھوٹی کمیونٹیز، کو شدید عملے کی قلت کا سامنا تھا۔
اس مسئلے کے حل کے لیے امریکی محکمۂ ہوم لینڈ سیکیورٹی (DHS) نے یہ کولنگ آف شرط مکمل طور پر ختم کر دی ہے۔ جنوری 2026 سے نافذ ہونے والے نئے ضابطے کے مطابق، پانچ سال کی مدت مکمل ہونے کے بعد ویزا ہولڈر ملک چھوڑ کر ایک سال انتظار کیے بغیر فوراً نئے آر-1 ویزا کے لیے درخواست دے سکتا ہے۔
اہلیت اور درخواست کا طریقہ
آر-1 ویزا کے لیے درخواست دہندہ کا کم از کم دو سال سے امریکہ میں تسلیم شدہ غیر منافع بخش مذہبی ادارے کا رکن ہونا ضروری ہے۔ اسے ہفتے میں اوسطاً کم از کم 20 گھنٹے مذہبی خدمات انجام دینا ہوں گی۔ صرف انتظامی یا کلرک نوعیت کے کام اس ویزا کے تحت قابل قبول نہیں ہیں۔
اسپانسر کرنے والا ادارہ پہلے امریکی امیگریشن ادارے (USCIS) میں فارم I-129 جمع کراتا ہے۔ منظوری کے بعد امیدوار اپنے ملک میں امریکی سفارت خانے میں ویزا انٹرویو دیتا ہے۔ یہ ویزا پہلے 30 ماہ کے لیے جاری ہوتا ہے اور بعد میں مزید 30 ماہ کی توسیع ممکن ہے۔ ماہرین کے مطابق EB-4 ویزا بیک لاگ کے تناظر میں یہ فیصلہ مذہبی کارکنوں اور ان کی کمیونٹیز کے لیے ایک بڑی راحت ہے۔
آر-1 ویزا ہولڈر کے اہل خانہ (بیوی / شوہر اور 21 سال سے کم عمر بچے) آر-2 ویزا پر امریکہ میں رہ سکتے ہیں، تاہم انہیں کام کرنے کی اجازت نہیں ہوتی۔
