غزہ میں فلسطینی ٹی وی چینل کی گاڑی پر اسرائیلی فوج کا حملہ، 5 صحافی شہید

حیدرآباد (دکن فائلز ویب ڈیسک) غزہ کے ایک اسپتال میں کوریج کرنے والے صحافیوں کی گاڑی پر اسرائیلی فورسس نے فضائی حملہ کردیا جس کے نتیجے میں 5 فلسطینی صحافی شہید ہوگئے۔

میڈیا رپورٹس کے مطابق صیہونی فوج نے نصیرات کیمپ میں واقع الاودا اسپتال میں کوریج کرنے والی القدس ٹی وی چینل کی وین پر فضائی حملہ کیا جس کے نتیجے میں 5 صحافیوں سمیت کم سے کم 10 فلسطینی شہید اور متعدد زخمی ہوگئے۔

اسرائیلی بربریت میں براڈ کاسٹنگ وین میں آگ بھڑک اٹھی اور وین مکمل تباہ ہوگئی جس کی ویڈیوز سوشل میڈیا پر دیکھی جا سکتی ہیں۔ جس براڈ کاسٹنگ وین پر اسرائیل نے حملہ کیا اس پر واضح طور پر پریس (Press) درج تھا۔

دوسری جانب اسرائیلی فوج نے صحافیوں پر ہونے والے حملے کی ذمہ داری کو قبول کرتے ہوئے کہا کہ ہم نے دہشتگردوں کے سیل کو نشانہ بنایا۔

صحافیوں کے حقوق کے لیے کام کرنے والی تنظیم کمیٹی ٹو پروٹیکٹ جرنلسٹس کے مطابق گزشتہ سال 7 اکتوبر سے غزہ، مغربی کنارے، اسرائیل اور لبنان میں کم از کم 141 صحافی اور میڈیا ورکرز قتل ہو چکے اور ان میں سے 133 غزہ کے فلسطینی تھے۔

اپنا تبصرہ بھیجیں