حیدرآباد (دکن فائلز) سعودی عرب کے چوکس فضائی دفاعی نظام نے بروقت اور مؤثر کارروائی کرتے ہوئے عالمِ اسلام کے مقدس ترین شہر مکہ مکرمہ کی جانب داغے گئے دو بیلسٹک میزائلوں کو فضا میں ہی تباہ کر کے ایک بڑے سانحے کو ٹال دیا۔ تاہم تباہ شدہ میزائلوں کا ملبہ مکہ مکرمہ کے نواحی علاقوں میں گرا، جس سے خوش قسمتی سے کسی جانی نقصان کی اطلاع نہیں ملی۔
بین الاقوامی خبر رساں ادارے رائٹرز کے مطابق سعودی سول ڈیفنس نے جمعرات کی علی الصبح جاری ایک بیان میں تصدیق کی کہ فضا میں تباہ کیے جانے والے دونوں میزائلوں کا ملبہ مکہ مکرمہ کے مضافات میں دو مختلف مقامات پر گرا۔ سعودی سرکاری ٹیلی وژن نے متاثرہ مقامات کی نشاندہی کرتے ہوئے بتایا کہ ایک میزائل کا ملبہ وادی المغمس میں گرا جو مسجد الحرام سے تقریباً 21 کلومیٹر مشرق میں واقع ہے، جبکہ دوسرے میزائل کا ملبہ صبوحہ گاؤں کے قریب گرا جو مسجد الحرام سے تقریباً 35 کلومیٹر شمال مشرق میں واقع ہے۔
سعودی سول ڈیفنس نے اس بزدلانہ کارروائی کی شدید الفاظ میں مذمت کرتے ہوئے کہا کہ حوثی ملیشیا کی جانب سے شہری آبادیوں اور مقدس مقامات کو نشانہ بنانا بین الاقوامی انسانی قوانین کی کھلی خلاف ورزی اور انتہائی خطرناک جارحانہ رویے کی عکاسی کرتا ہے۔
مکہ مکرمہ اور بالخصوص مسجد الحرام جیسے مقدس ترین مقام، جہاں دنیا بھر کے کروڑوں مسلمانوں کی عقیدتیں وابستہ ہیں، کی جانب بیلسٹک میزائل داغنا محض ایک عسکری کارروائی نہیں بلکہ پورے عالمِ اسلام کے جذبات پر حملہ اور کھلی دہشت گردی ہے۔ حوثی باغیوں کی جانب سے بار بار حرمین شریفین کے تقدس کو پامال کرنے کی کوششیں اس بات کا ثبوت ہیں کہ یہ عناصر خطے کے امن و استحکام کو تباہ کرنے پر تلے ہوئے ہیں۔ انسانی جانوں اور عبادت گاہوں کو نشانہ بنانے والا یہ جارحانہ رویہ کسی بھی مذہب، اخلاقیات یا عالمی قانون کے تحت ناقابلِ معافی اور انتہائی قابلِ مذمت ہے۔
دوسری جانب، تاحال میزائل داغے جانے کے اس واقعے پر حوثی ملیشیا کا کوئی باضابطہ ردعمل یا آزاد ذرائع سے مزید تفصیلات سامنے نہیں آئی ہیں، تاہم سعودی دفاعی حکام نے اس عزم کا اعادہ کیا ہے کہ مملکت کی سلامتی اور مقدس مقامات کے تحفظ پر کوئی آنچ نہیں آنے دی جائے گی۔
