ابوظہبی: ماہرینِ فلکیات نے کی جانب سے پیشگوئی کی گئی ہے کہ متحدہ عرب امارات میں رمضان المبارک 2026 کا آغاز جمعرات 19 فروری سے ہوگا۔ میڈیا رپورٹس کے مطابق اماراتی فلکیاتی سوسائٹی کے مطابق ابتدائی حسابات بتاتے ہیں کہ رمضان المبارک میں اب صرف 139 دن باقی ہیں۔
سوسائٹی کے چیئرمین ابراہیم الجروان نے وضاحت کی کہ نیا چاند 17 فروری بروز منگل شام 4 بج کر 1 منٹ پر پیدا ہوگا، تاہم سورج غروب ہونے کے محض ایک منٹ بعد ہی غروب ہوجائے گا، جس کے باعث اُس شام چاند کا دکھائی دینا ممکن نہیں ہوگا۔
فلکیاتی حسابات کے مطابق پہلا روزہ 19 فروری جمعرات کو ہونے کا امکان ہے، البتہ اس کی حتمی تصدیق رویتِ ہلال کمیٹی کرے گی۔ ماہرین کے مطابق رمضان کے آغاز پر ابوظہبی میں روزے کا دورانیہ تقریباً 12 گھنٹے 46 منٹ ہوگا، جو مہینے کے اختتام تک بڑھ کر 13 گھنٹے 25 منٹ تک پہنچ جائے گا۔
واضح رہے کہ ہندوستان، پاکستان، بنگلہ دیش و دیگر ممالک میں چاند اکثر ایک دن بعد دکھائی دیتا ہے۔ اسی لئے ماہرین کے مطابق ان ممالک میں رمضان کا آغاز 20 فروری سے ہوسکتا ہے۔
