حیدرآباد (دکن فائلز ویب ڈیسک) ایران کے نئے سپریم لیڈر مجتبیٰ خامنہ ای نے جنگ بندی کے بعد اپنے پہلے بیان میں واضح کیا ہے کہ ایران جنگ کا خواہاں نہیں، تاہم اپنے حقوق سے کسی صورت دستبردار نہیں ہوگا اور آیت اللہ خامنہ ای سمیت تمام شہداء کے خون کا بدلہ لیا جائے گا۔
سرکاری ٹی وی پر پڑھ کر سنائے گئے تحریری بیان میں مجتبیٰ خامنہ ای نے کہا کہ ایران مزاحمتی محاذ کو ایک متحد قوت سمجھتا ہے، جس میں اس کے علاقائی اتحادی بھی شامل ہیں۔ انہوں نے کہا کہ ملک اپنے شہداء کے خون کا حساب ضرور لے گا اور زخمیوں کے لیے مکمل معاوضہ حاصل کرے گا۔
انہوں نے مزید کہا کہ ایران آبنائے ہرمز کے انتظام کو ایک نئے مرحلے میں داخل کرے گا، تاہم اس حکمت عملی کی تفصیلات ظاہر نہیں کی گئیں۔ بیان میں دعویٰ کیا گیا کہ حالیہ جنگ میں ایران نے کامیابی حاصل کی اور دشمن کو پسپائی اختیار کرنے پر مجبور کیا۔
واضح رہے کہ 28 فروری کو ایک اسرائیلی حملے میں آیت اللہ علی خامنہ ای کے جاں بحق ہونے کے بعد ان کے بیٹے مجتبیٰ خامنہ ای کو نیا سپریم لیڈر منتخب کیا گیا، تاہم وہ اب تک عوامی سطح پر منظرعام پر نہیں آئے ہیں۔
