حیدرآباد (دکن فائلز) سعودی عرب کے مفتی اعظم شیخ صالح الفوزان نے ماہِ ذوالحجہ کی آمد کے موقع پر عالمِ اسلام کے مسلمانوں کے نام خصوصی پیغام جاری کرتے ہوئے ابتدائی دس دنوں میں زیادہ سے زیادہ عبادت، ذکرِ الٰہی اور نیک اعمال کرنے کی تلقین کی ہے۔
شیخ صالح الفوزان نے اپنے پیغام میں کہا کہ ذوالحجہ کے ابتدائی ایام اللہ تعالیٰ کے نزدیک انتہائی بابرکت اور محبوب دن ہیں، اس لیے مسلمانوں کو چاہیے کہ وہ ان دنوں میں نماز، روزے، صدقات، تلاوتِ قرآن اور ذکرِ الٰہی کا خصوصی اہتمام کریں۔
انہوں نے یومِ عرفہ کے روزے کی فضیلت بیان کرتے ہوئے کہا کہ جو مسلمان حج پر نہ ہوں، ان کے لیے عرفہ کے دن کا روزہ دو سال کے گناہوں کا کفارہ بنتا ہے۔ مفتی اعظم نے قربانی کرنے والے مسلمانوں کو ہدایت دی کہ ذوالحجہ کا چاند نظر آنے کے بعد قربانی کرنے تک اپنے بال اور ناخن نہ کاٹیں، کیونکہ یہ عمل سنت کے مطابق ہے۔
انہوں نے کہا کہ مسلمانوں کو چاہیے کہ وہ ان مبارک دنوں کو غفلت میں ضائع نہ کریں بلکہ عبادت، دعا، استغفار اور خیرات کے ذریعے اللہ تعالیٰ کا قرب حاصل کرنے کی کوشش کریں۔ انہوں نے امتِ مسلمہ کے لیے امن، خیر و برکت اور اتحاد کی دعا بھی کی۔
