انٹرنیشنل کرکٹ کونسل (آئی سی سی ) نے کرکٹ کو اولمپکس میں شامل کرنے کیلئے کوششیں تیز کردی ہیں۔ اس حوالے سے بات کرتے ہوئے آئی سی سی کے چیئرمین گریگ بارکلے کا کہنا تھا کہ دنیا بھر میں کرکٹ کے 1 ارب سے زیادہ فینز ہیں، 90 فیصد شائقین چاہتے ہیں کہ کرکٹ کو اولمپکس میں شامل کیا جائے۔
آئی سی سی کے مؤقف کے مطابق انٹرنیشنل اولمپک کمیٹی (آئی او سی) کرکٹ کو اولمپکس میں شامل کرکے انڈین مارکیٹ سے بڑی کمائی کرسکتی ہے،آئی او سی انڈیا سےمیڈیا رائٹس کی مد میں 130 سے 260 ملین ڈالر کماسکتی ہے۔
کرکٹ کو اولمپکس میں شامل کرنے کے لیے آئی سی سی جے شاہ کی سربراہی میں کمیٹی بنا چکا ہے۔ آئی سی سی کی تجویز ہے کہ اولمپکس میں مرد و خواتین کی 6،6 کرکٹ ٹیمیں ٹی ٹوئنٹی فارمیٹ پر کھیلیں۔ رپورٹس کے مطابق کرکٹ کو شامل کرنے کا حتمی فیصلہ ممبئی میں آئی او سی کی اکتوبر میں ہونے والی میٹنگ میں کیا جائے گا۔
