ممبئی (ایجنسیز) مہاراشٹر کے خاندیش علاقے کے ایرنڈول نامی شہر میں واقع 1610 میں تعمیر جامع مسجد کو سی آرپی سی کی دفعہ 145 کے تحت سیل کئے جانے کا حکم جلگاؤں کے ضلع کلکٹر نے جاری کیا جس کے بعد سے علاقے کے مسلمانوں میں بے چینی پھیل گئی۔
علاؤالدین خلجی کے وقت کی تعمیر اس تاریخی مسجد میں مسلمان صدیوں سے پنج وقتہ نماز ادا کرتے آئے ہیں لیکن ضلع کلکٹر کے مسجد کو سیل کئے جانے کے عبوری حکم نامے کے بعد مسجد میں پنج وقتہ نماز کی ادائیگی خطرہ میں پڑ گئی ہے۔ مسجد کے ٹرسٹیوں اور مقامی لوگوں سے ملنے والی معلومات کے مطابق پانڈو واڑہ سنگھرش سمیتی نامی ہندوؤں کی ایک تنظیم نے مسجد پر اپنا دعوی پیش کرتے ہوئے یہ کہاکہ یہ مسجد پانڈوواڑہ تھی جسے منہدم کرکے مسجد کی تعمیر کی گئی تھی اور ان کی جگہ پر قبضہ کیا گیا۔
18/ مئی 2023 کو پانڈوواڑہ سمیتی کے صدر پرمدھوسدن دنڈوتتے نے ضلع کلکٹر جلگاؤ ں میں ایک عرضداشت داخل کی اورکہا کہ پانڈووڑا کی ملکیت کی اراضی پر ناجائز قبضہ کیا گیا اور یہ قبضہ جامع مسجد ٹرسٹ نے کیا ہے لہذا اراضی کی پیمائش کی جائے اور مسجد کو سیل کرنے کا حکم جاری کیا جائے۔ ضلع کلکٹر جلگاؤں امن متل نے 11 / جولائی کو عرض گذار، جامع مسجد ٹرسٹ، تحصیل دار اور محکمہ آثار قدیمہ کے نمائندوں کو سماعت کے لیئے طلب کیا تھا۔
ضلع کلکٹرنے فریقین کے دلائل کی سماعت کے بعد سی آر پی سی کی دفعہ 145 / کے تحت عبوری حکم نامہ جاری کرتے ہوئے مسجد کو سیل کیئے جانے کا حکم دیا، ضلع کلکٹر نے 13/ جولائی کو مہاراشٹر وقف بورڈ کے نمائندے کو مسجد کے کاغذات کے ساتھ طلب کیا ہے۔ ضلع کلکٹر نے معاملے کی سنگینی کو دیکھتے ہو ئے علاقے میں 144 بھی نافذ کیئے جانے کا حکم دیا۔ ضلع کلکٹر نے 13/ جولائی کی شام تک مسجد میں صرف دولوگوں کو نماز ادا کرنے کی اجازت دیئے جانے کا حکم جاری کیا ہے۔
ضلع کلکٹر کی جانب سے مسجد کو سیل کئے جانے کے عبوری حکم نامہ جاری کرنے کے بعد جامع مسجد ٹرسٹ (ایڈہاک کمیٹی) کے نمائندوں نے جمعیۃ علماء ہند (ارشد مدنی) قانونی امداد کمیٹی کے سربراہ گلزار اعظمی اور قانونی مشیر ایڈوکیٹ شاہد ندیم سے رابطہ قائم کیا اور ضلع کلکٹر کی جانب سے کی جانے والی کاروائی کے متعلق انہیں مطلع کیا۔ معاملے کی سنگینی کے مدنظر گلزار اعظمی نے مہاراشٹر وقف بورڈ کے چیئر مین وجاہت مرزا سے رابطہ قائم کیا اور ان سے درخواست کی کہ وہ اس معاملے میں فوراً مداخلت کریں اور 13/ جولائی کو ضلع کلکٹر کے روبرو سینئر وکیل کو کھڑا کریں جو ثبوت و شو اہد کی بنیاد پر بحث کرکے عبوری حکم نامے کو کالعدم قرار دینے کی کلکٹر سے درخواست کرے۔ اس ضمن میں گلزار اعظمی نے چیئرمین وقف بورڈ کو ایک خط بھی لکھا۔ چیئر مین وقف بورڈ نے گلزار اعظمی کو یقین دلایا کہ وہ ٹرسٹیوں کے مسلسل رابطہ میں ہیں اور ضلع کلکٹر کے سامنے وقف بورڈ کی جانب سے جامع مسجد ایرنڈول کی پیروی کی جائے گی۔
