حیدرآباد (دکن فائلز) امریکی صدر کی رہائش گاہ وائٹ ہاؤس کے قریب فائرنگ کا واقعہ پیش آیا۔ پولیس نے ایک مشتبہ شخص کو شدید زخمی حالت میں حراست میں لے لیا۔ سیکیورٹی ہائی الرٹ کرکے وائٹ ہاؤس عارضی طور پر بند کردیا گیا۔ رونالڈ ریگن ایئرپورٹ پر آپریشن کچھ دیر معطل رہی۔ واقعہ کے وقت امریکی صدر فلوریڈا میں موجود تھے۔
ڈونلڈ ٹرمپ نے کہا کہ حملہ آور انسان نہیں جانور ہیں ۔ مجرموں کو بھاری قیمت چکانی ہوگی ۔ کہا پورا یقین ہے مشتبہ شخص افغانستان سے امریکہ میں داخل ہوا ۔ 2021 میں بائیڈن انتظامیہ نے اُسے نہیں روکا۔ امریکی میڈیا کے مطابق حملہ آور کی شناخت افغان شہری رحمان اللہ کے نام سے ہوئی۔
وزیرجنگ پیٹ ہیگستھ نے واشنگٹن میں 500 اضافی اہلکار تعینات کرنے کا اعلان کردیا۔ ایف بی آئی ڈائیریکٹر کاش پٹیل کا کہنا ہے بظاہر حملہ آور ایک ہی تھا جس نے گھات لگاکر فائرنگ کی۔ یہ ہماری قومی سلامتی کا معاملہ ہے۔ مختلف ایجنسیاں واقعہ کی تحقیقات کر رہی ہیں۔
پولیس چیف کے مطابق اس وقت صرف ایک ہی مشتبہ شخص ہے جسے حراست میں لیا گیا ہے۔ اُس کی حالت بھی تشویشناک ہے۔ ڈیموکریٹس رہنماؤں کی جانب سے بھی واقعے کی شدید مذمت کی گئی۔ کہا امریکا میں پرتشدد واقعات کی کوئی گنجائش نہیں۔
