حیدرآباد (دکن فائلز) حیدرآباد: شہر کے چندرائن علاقہ میں انسانیت کو شرمسار کرنے والا واقعہ پیش آیا، جہاں سوتیلے باپ نے معمولی بات پر 10 سالہ بچے کو بے رحمی سے تشدد کا نشانہ بنا کر قتل کر دیا۔ شدید زخمی بچے نے علاج کے دوران دم توڑ دیا۔
پولیس کے مطابق، چندرائن کی غازی ملت کالونی کی رہائشی نفیس بیگم کی پہلی شادی سے ایک بیٹی (15 سال) اور بیٹا شیخ محمد عظمت اظہر (10 سال) ہے۔ شوہر سے اختلافات کے بعد انہوں نے طلاق لے لی تھی اور بعد میں مانصاحب ٹینک علاقہ سے تعلق رکھنے والے آٹو ڈرائیور شیخ عمران سے دوسری شادی کی تھی۔ اظہر اپنی ماں اور سوتیلے باپ کے ساتھ ہی رہتا تھا۔
بتایا جا رہا ہے کہ 7 تاریخ کو اظہر کا پڑوسی بچوں سے جھگڑا ہوا تھا۔ پڑوسیوں نے شکایت کی کہ بچہ گالی گلوچ کر رہا تھا۔ اس پر سوتیلے باپ شیخ عمران کو شدید غصہ آ گیا۔ پہلے اس نے بچے کو تھپڑ مارے اور پھر اسے اٹھا کر زور سے سڑک پر پٹخ دیا۔ اس حملے میں بچہ کے سر پر شدید چوٹیں آئیں اور کانوں سے خون بہنے لگا۔
خاندان کے افراد فوراً بچے کو پہلے اویسی اسپتال اور بعد میں گاندھی اسپتال لے گئے، جہاں علاج کے دوران اس کی حالت بگڑتی چلی گئی اور بالآخر اس نے دم توڑ دیا۔
اطلاع ملتے ہی چاندریان گٹہ پولیس نے مقدمہ درج کر لیا ہے۔ ملزم کو حراست میں لے کر پوچھ گچھ کی جا رہی ہے، جبکہ دوسری اطلاعات کے مطابق وہ واردات کے بعد فرار ہو گیا تھا اور پولیس اس کی تلاش میں چھاپے مار رہی ہے۔ واقعہ کے بعد علاقے میں شدید غم و غصہ پایا جا رہا ہے۔
