حیدرآباد (دکن فائلز) 2024 میں ہونے والے عام انتخابات کےلئے ملک کی تمام سیاسی پارٹیوں نے اپنی سرگرمیوں میں اضافہ کردیا ہے۔ نئے اتحاد بن رہے ہیں جبکہ عوام کو راغب کرنے کےلئے وعدوں کی بوچھار کی جارہی ہے۔ بی جے پی ہرحال میں حکومت کو برقرار رکھنے کےلئے اپنی کوششوں میں جٹ گئی ہے جبکہ اپوزیشن نے بھی مودی کو اقتدار سے ہٹانے کی ٹھان لی ہے۔
ان سب کے بیچ کچھ سیاسی رہنما عام انتخابات کے وقت سے پہلے انعقاد کا امکان ظاہر کررہے ہیں۔ ترنمول کانگریس کی سربراہ و مغربی بنگال کی وزیراعلیٰ ممتا بنرجی نے لوک سبھا انتخابات جاریہ سال دسمبر یا آئندہ سال جنوری میں ہونے کا امکان ظاہر کیا ہے۔ انہوں نے کہا کہ مودی حکومت، اپوزیشن انڈیا کے زیادہ طاقتور ہوجانے سے خوف زدہ ہے اور مئی 2024 سے قبل ہی انتخابات کرانے کا منصوبہ بنایا جارہا ہے۔
ممتا بنرجی کی دلیل کی تائید کرتے ہوئے بہار کے وزیراعلیٰ نے کہا کہ لوک سبھا انتخابات قبل ازوقت ہوسکتے ہیں۔ انہوں نے اس بات کا بھی امکان ظاہر کیا کہ عام انتخابات اسی سال بھی منعقد ہوسکتے ہیں۔
واضح رہے کہ حال ہی میں ٹی ڈی پی سربراہ چندرابابو نائیڈو نے بھی دہلی میں قبل از وقت انتخابات کی بات کہی ہے۔ قبل از وقت عام انتخابات کے انعقاد کو لیکر سیاسی سرگرمی اور بھی تیز ہوگئی ہے۔
