حیدرآباد (دکن فائلز) اترپردیش کے شاہجہاں پور میں کچھ شرپسندوں نے مسجد پر بھگوا جھنڈا لگایا جس کے بعد پولیس نے کاروائی کرتے ہوئے تین غنڈوں کو گرفتار کرلیا۔ رام مندر کے افتتاح کے بعد سے اشرار کی جانب سے ملک کے ماحول کو بگاڑنے کی ناپاک کوشش کی جارہی ہے۔ روزنامہ خبریں کی رپورٹ کے مطابق شاہجہاں پور کے واقعہ کی پولیس نے تصدیق کی ہے۔
تفصیلات کے مطابق شاہجہاں پور میں رام چندر مشن تھانہ علاقہ کے لال باغ علاقہ میں غنڈہ گردی و شرپسندی کا یہ واقعہ پیش آیا۔ اس واقعہ میں گرفتار شرپشند ملزمان کی شناخت انکت کتھیریا، روہت جوشی اور روہت سکسینہ کے طور پر کی گئی۔ اس واقعہ میں ملوث چوتھا ملزم فرار ہوگیا اور پولیس اسے تلاش کررہی ہے۔
پولیس افسر سی پی شکلا نے بتایا کہ 22 جنوری کی رات تقریباً 8 بجے تین ملزمین نے مسجد پر چڑھ کر بھگوا جھنڈا لگایا جس پر جے ایس آر کا نعرہ تحریر تھا۔ مقامی شخص فیض اللہ کی شکایت کے بعد اس معاملہ میں مقدمہ درج کیا گیا۔ تینوں ملزمان کو عدالتی تحویل میں بھیج دیا گیا ہے اور مزید کارروائی جاری ہے۔
