حیدرآباد (دکن فائلز) سپریم کورٹ نے الیکٹورل بانڈ کو غیرآئینی قرار دیتے ہوئے کہا کہ یہ حقِ اطلاعات قانون کی خلاف ورزی کرتا ہے جبکہ ووٹرز کو پارٹیوں کی فنڈنگ کے بارے میں جاننے کا پورا حق ہے۔ تفصیلات کے مطابق لوک سبھا انتخابات کے اعلان سے ایک ماہ قبل سپریم کورٹ نے الیکٹورل بانڈ پر اپنا اہم فیصلہ سنادیا ہے۔ عدالت عظمیٰ نے اسے غیر آئینی قرار دے دیا۔ عدالت نے کہا کہ انتخابی بانڈ حقِ اطلاعات قانون کی خلاف ورزی کرتا ہے اور کالے دھن پر لگام لگانے کی غرض سے حق اطلاعات کی خلاف ورزی مناسب نہیں ہے۔
خیال رہے کہ چیف جسٹس ڈی وائی چندرچوڑ کی سربراہی والی سپریم کورٹ کی پانچ ججوں کی آئینی بنچ گزشتہ سال 31 اکتوبر سے اس معاملے پر باقاعدہ سماعت شروع کی تھی۔ اس دوران عدالت نے اس کیس کی مسلسل 3 دن تک سماعت کی اور اپنا فیصلہ محفوظ رکھا تھا۔ سپریم کورٹ کا الیکٹورل بانڈ کو غیر آئینی قرار دینا مرکزی حکومت کے لیے ایک بڑا جھٹکا ہے۔
