حیدرآباد (دکن فائلز) 28 سالہ لکشمی نارائن اپنی شادی سے ایک ماہ قبل خوبصورت مسکراہٹ کے لیے ڈینٹل کلینک میں سرجری کروانے کے دوران ہلاک ہوگیا۔ میڈیا رپورٹس کے مطابق یہ واقعہ تلنگانہ کے شہر حیدرآباد میں پیش آیا۔ لکشمی نارائن ایف ایم ایس انٹرنیشنل ڈینٹل کلینک میں شادی سے قبل دانتوں کو خوبصورت بنانے کےلئے سرجری کروانے کے دوران ہلاک ہوگیا۔
خوبصورت مسکراہٹ کے لیے لکشمی نارائن کو ڈینٹل کلینک میں دانتوں کی گھسائی، دانتوں کا رنگ مکمل سفید کرنے اور دانتوں کے درمیان خلا کو بھرنے کے عمل سے گزرنا تھا۔ یہ ایک طویل عمل تھا جس کے دوران نامعلوم وجوہات کی بنا پر لکشمی نارائن کی موت واقع ہوگئی۔ ان کے والد نے ڈاکٹرز پر لاپرواہی کا الزام عائد کیا۔
لکشمی نارائن کے والد نے بتایا کہ ان کے فرزند کی گزشتہ ہفتے منگنی ہوئی تھی اور آئندہ ماہ شادی طے تھی۔ اہل خانہ کی شکایت پر ڈینٹل کلینک کے خلاف مقدمہ درج کرلیا گیا۔
