حیدرآباد (دکن فائلز) تلنگانہ اسٹینڈرڈز اتھارٹی فار فوڈ اینڈ اسینشل ڈرگس (TG SAFE) کے انفورسمنٹ ونگ نے حیدرآباد کے مرکزی شہری علاقوں میں فوڈ سیفٹی کے حوالے سے خصوصی مہم چلاتے ہوئے 19 کیفے اور اسنیک پوائنٹس کا معائنہ کیا۔ میڈیا رپورٹس کے مطابق کارروائی کے دوران حفظانِ صحت، کھانے کی اشیا کی ذخیرہ کاری، لائسنس اور دیگر ضوابط سے متعلق متعدد خلاف ورزیاں سامنے آئیں۔
اس خصوصی مہم کے لیے نو ٹیمیں تشکیل دی گئی تھیں، جن میں فوڈ سیفٹی افسران کے ساتھ پولیس اہلکار بھی شامل تھے۔ معائنے کے دوران زائدالمیعاد اشیائے خوردونوش سے لے کر کاکروچ اور صفائی کے ناقص انتظامات تک مختلف خامیاں پائی گئیں۔
حکام نے حیدرآباد کے مدینہ سرکل پر واقع مشہور و معروف شاداب ہوٹل کا FSSAI لائسنس معطل کردیا اور انتظامیہ کو فوری طور پر کاروباری سرگرمیاں بند کرنے کی ہدایت دی۔ حکام کے مطابق معائنے کے دوران ہوٹل میں صفائی اور حفظانِ صحت کے انتظامات کے علاوہ گوشت اور دیگر غذائی اشیا کو ذخیرہ کرنے اور رکھنے کے طریقۂ کار میں متعدد خلاف ورزیاں پائی گئیں۔
کارروائی کے دوران باغ لنگم پلی کا ڈریمز کیفے ٹیریا اور پنجہ گٹہ کا ایشیاٹک کیفے بھی بند کرادیا گیا۔ حکام کے مطابق دونوں ادارے مؤثر FSSAI لائسنس یا رجسٹریشن کے بغیر کام کررہے تھے۔ TG SAFE کی ٹیموں نے شہر کے مختلف علاقوں میں 19 اداروں کا معائنہ کیا۔ ان میں سکندرآباد کے کلاک ٹاور ٹی کیفے اور بلیو سی کیفے، ہمایوں نگر کا میروسا کیفے، امیرپیٹ کا امروز کیفے، نامپلی کا کیفے پرشیا اور ایس آر نگر کا پرسیس سمیت دیگر ادارے شامل تھے۔
معائنہ کے دوران حکام نے متعدد مقامات پر:
* کھلے کچرے کے ڈبے اور فوڈ پریپریشن ایریا میں گندگی؛
* فوڈ ہینڈلرز کا ہیڈ کور استعمال نہ کرنا؛
* زائدالمیعاد غذائی اشیا؛
* خوراک کو غیر مناسب طریقے سے ذخیرہ کرنا؛
* فوڈ لیبلنگ اور ڈسپلے سے متعلق ضوابط کی خلاف ورزی؛
* مکھیوں اور کاکروچ کی موجودگی؛
* فوڈ ہینڈلرز کے FoSTaC ٹریننگ سرٹیفکیٹس اور ہیلتھ ریکارڈز کی عدم دستیابی؛
* اور پیسٹ کنٹرول ریکارڈز کی کمی جیسے مسائل کی نشاندہی کی۔
حکام نے ایسی قابلِ تلف غذائی اشیا بھی موقع پر ضائع کردیں جو دھول اور مکھیوں کے براہِ راست رابطے میں تھیں۔ اس کے علاوہ چائے پاؤڈر، ادرک لہسن کا پیسٹ اور بسکٹ سمیت بعض ایسی اشیا بھی ضبط کی گئیں جن کے معیار یا ملاوٹ کے حوالے سے شبہ ظاہر کیا گیا۔ ان اشیا کے نمونے جانچ کے لیے لیبارٹری بھیجے گئے۔
حکام کی جانب سے کیفے پرشیا، بہار بریانی کیفے، کیفے دکن، ہنی مون کیفے، ریو ریسٹورنٹ، آرومیل ہاسپیٹیلٹی، فرینڈز اینڈ کیفے، ڈائمنڈ پوائنٹ ہوٹل، ہوٹل امروز، بلیو سی ٹی اینڈ اسنیکس، نمرہ کیفے اینڈ بیکری اور گلزار فوڈز (پرسیس کیفے) کو بہتری کے نوٹس جاری کیے جانے ہیں۔
ان اداروں کو معائنے کے دوران سامنے آنے والی خامیوں کو دور کرنے کی ہدایت کی جائے گی اور بعد میں دوبارہ معائنہ کرکے یہ دیکھا جائے گا کہ آیا متعلقہ اداروں نے خامیوں کو دور کیا یا نہیں۔ اسی طرح گولڈن کیفے، ڈریمز کیفے ٹیریا، میروسا کیفے اینڈ کچن (فائرا فوڈز)، ایشیاٹک کیفے اور شبّاد ہوٹل کو وجہ بتاؤ نوٹس جاری کیے گئے ہیں۔ حکام کے مطابق ان کے جوابات کی بنیاد پر مزید کارروائی، بشمول جرمانے، کی جاسکتی ہے۔
فوڈ سیفٹی حکام کی یہ کارروائی حیدرآباد میں عوام کو محفوظ اور معیاری غذائی اشیا کی فراہمی یقینی بنانے اور فوڈ بزنس آپریٹرز کو حفظانِ صحت و قانونی تقاضوں کی پابندی کا پابند بنانے کی کوشش کا حصہ ہے۔
