حیدرآباد (دکن فائلز) تلگو فلم انڈسٹری نے کئی بلاک بوسٹر فلموں کی وجہ سے فلم انڈسٹری میں اپنا دبدبہ برقرار رکھے ہوئے ہے۔ اسی سلسلہ کو برقرار رکھتے ہوئے الو ارجن کی طویل انتظار کے بعد ریلیز ہونے والی فلم “پشپا 2: دی رول” نے باکس آفس پر دھماکہ خیز انٹری دی ہے۔ فلم نے پہلے دن 175.1 کروڑ روپے نیٹ کمائی کرکے ہندوستانی سینما کی تاریخ میں سب سے بڑی اوپننگ کا ریکارڈ قائم کیا، جو اس سے پہلے ایس ایس راجامولی کی فلم “RRR” کے پاس تھا۔
“پشپا 2” کے زیادہ تر کلیکشن تلگو ورژن سے آئے، جس نے 95.1 کروڑ روپے کمائے، جبکہ ہندی ورژن نے 67 کروڑ روپے کا شاندار بزنس کیا۔ تمل ورژن نے 7 کروڑ، ملیالم نے 5 کروڑ اور کنڑ ورژن نے 1 کروڑ کا حصہ ڈالا۔ تلگو ورژن کے شوز کی اوسط نشستیں 82.66 فیصد تک بھر گئیں، جبکہ نائٹ شوز نے 90.19 فیصد تک کے حیرت انگیز اعداد و شمار حاصل کیے۔
فلم میں الو ارجن نے ایک بار پھر اپنے مشہور کردار پشپا راج کو نبھایا ہے، جبکہ رشمیکا مندانا سری ولی اور فہد فاضل بھنور سنگھ شیکاوت کے کردار میں نظر آئے۔ فلم کی کہانی سرخ چندن کی اسمگلنگ کے گرد گھومتی ہے اور اسے ڈائریکٹر سکومار نے ہدایت دی ہے۔
