حیدرآباد (دکن فائلز ) انڈین کرکٹ ٹیم کے فاسٹ بولر محمد سراج اور لیجنڈری گلوکارہ آشا بھوسلے کی پوتی گلوکارہ زنائی بھوسلے کی حالیہ دنوں ڈیٹنگ کی افواہوں کی دونوں نے دلچسپ انداز میں تردید کردی ہے۔ میڈیا رپورٹس کے مطابق زنائی بھوسلے کی جانب سے کرکٹر کے ساتھ ڈیٹنگ کی خبروں پر دلچسپ ردعمل سامنے آیا ہے جس کی محمد سراج نے بھی توثیق کی ہے۔
زنائی بھوسلے نے حال ہی میں اپنی 23ویں سالگرہ کے موقع پر سراج کے ساتھ لی گئی تصویر شیئر کی، اس تصویر کے سوشل میڈیا پر وائرل ہونے کے بعد صارفین کی جانب سے گلوکارہ اور کرکٹر کی ایک دوسرے کے ساتھ ڈیٹنگ کی قیاس آرائیوں کا سلسلہ شروع ہوگیا۔ ان قیاس آرائیوں پر محمد سراج اور زینائی بھوسلے نے دلچسپ ردعمل دیتے ہوئے تردید بھی کی۔
زنائی بھوسلے نے تردید کرتے ہوئے اسی تصویر کو اپنی انسٹاگرام اسٹوری پر دوبارہ شیئر کرتے ہوئے لکھا ’میرے پیارے بھائی۔‘ جس کے بعد حیدرآبادی کرکٹر محمد سراج نے بھی زنائی بھوسلے کی اس سٹوری کو اپنے انسٹاگرام اکاؤنٹ پر ری پوسٹ کرتے ہوئے بہن سے متعلق ایک نظم لکھ ڈالی۔
محمد سراج نے لکھا ’میری بہنا کے جیسی کوئی بہنا نہیں، بِنا اس کے مجھے کہیں بھی رہنا نہیں، جیسے ہے چاند ستاروں میں، میری بہنا ہے ایک ہزاروں میں۔‘
