حیدرآباد (دکن فائلز) بالی ووڈ کے سپر اسٹار اکشے کمار نے حال ہی میں ایک دل دہلا دینے والا واقعہ شیئر کیا ہے جو ہر والدین کے لیے ایک الارم ہے۔ یہ واقعہ سائبر کرائم کے بڑھتے ہوئے خطرے کی نشاندہی کرتا ہے، جو ہمارے بچوں کی زندگیوں کو متاثر کر رہا ہے۔
انہوں نے کہا کہ ایک نامعلوم شخص نے ویڈیو گیم کے دوران ان کی بیٹی سے نازیبا مطالبہ کیا۔ یہ انکشاف انہوں نے ریاستی پولیس ہیڈکوارٹر، ممبئی میں منعقدہ ’سائبر آگاہی مہینے‘ کی افتتاحی تقریب سے خطاب کرتے ہوئے کیا۔ اکشے کمار نے بتایا کہ یہ واقعہ چند ماہ قبل پیش آیا، جب ان کی 13 سالہ بیٹی ایک آن لائن ویڈیو گیم کھیل رہی تھی۔
اداکار نے بتایا کہ میری بیٹی ایک ویڈیو گیم کھیل رہی تھی، جو کہ کسی اجنبی کے ساتھ آن لائن کھیلی جا رہی تھی۔ کھیل کے دوران ایک پیغام آیا: ’آپ مرد ہیں یا عورت؟‘ جس پر میری بیٹی نے جواب دیا: ’عورت‘۔ اس کے بعد اگلا پیغام آیا ’کیا آپ اپنی ننگی تصاویر بھیج سکتی ہیں؟‘ جس پر اُس نے فوراً گیم بند کیا اور جا کر اپنی ماں کو پوری بات بتائی۔
اکشے کمار نے کہا کہ ان کی بیٹی کی فوری اور سمجھداری پر مبنی کارروائی قابلِ ستائش ہے، تاہم ہر بچہ اتنا باخبر یا خوداعتماد نہیں ہوتا، اور یہی وہ نکتہ ہے جہاں معاشرے کو بچوں کو سائبر دنیا کے خطرات سے آگاہ کرنے کی ضرورت ہے۔
ویڈیو دیکھنے کےلئے لنک پر کلک کریں:
https://x.com/i/status/1974025834919817462
انہوں نے حکومتِ مہاراشٹرا سے درخواست کرتے ہوئے کہا کہ میری وزیر اعلیٰ صاحب سے گزارش ہے کہ ریاست کے تمام اسکولوں میں ساتویں تا دسویں جماعت کے طلبا کے لیے ہفتہ وار ایک خصوصی ’سائبر پیریڈ‘ رکھا جائے، جہاں بچوں کو انٹرنیٹ، سوشل میڈیا، اور آن لائن گیمز میں درپیش ممکنہ خطرات کے بارے میں آگاہی دی جائے۔
اداکار نے مزید کہا کہ سائبر جرائم کی نوعیت اور شدت اس وقت روایتی سڑکوں پر ہونے والے جرائم سے بھی زیادہ سنگین ہوتی جا رہی ہے، اور اگر فوری اقدامات نہ کیے گئے تو آنے والی نسلوں کو شدید نقصان پہنچ سکتا ہے۔
