حیدرآباد (دکن فائلز) ٹی وی اور فلم انڈسٹری کے مشہور اداکار پنکج دھیر طویل علالت کے بعد 68 برس کی عمر میں چل بسے۔ وہ مشہور سیریل ’مہابھارت‘ میں کرن کا کردار نبھایا تھا۔ ان کی موت کینسر کے باعث ہوئی، جس کی تصدیق ان کے قریبی دوست امیت بہل نے کی۔
پنکج دھیر کچھ عرصے سے کینسر کے مرض میں مبتلا تھے۔ حال ہی میں انہوں نے ایک بڑا آپریشن بھی کروایا تھا۔
پنکج دھیر نے اپنے کیریئر کا آغاز 1980 کی دہائی میں کیا اور بی آر چوپڑا کی مہاکاوی سیریز ’مہابھارت‘ میں کرن کے کردار نے انہیں راتوں رات شہرت کی بلندیوں پر پہنچا دیا۔ ان کی باوقار اداکاری، مکالمہ کی ادائیگی اور جذباتی گہرائی آج بھی ناظرین کے دلوں میں تازہ ہے۔ بعد ازاں، انہوں نے چندرکانتا میں راجا شِودت، دی گریٹ مرہٹھا، یوگ میں علی خان جیسے یادگار کردار ادا کیے۔ وہ عدالتی سیریل ’قانون‘ میں بھی جلوہ گر ہوئے۔
پنکج دھیر نے فلمی دنیا میں بھی اپنی پہچان بنائی۔ وہ ’صنم بے وفا‘، ’بادشاہ‘ سمیت متعدد فلموں میں نظر آئے۔ بعد ازاں انہوں نے ہدایت کاری کا آغاز کرتے ہوئے فلم ’مائی فادر گاڈ فادر‘ بنائی۔ اداکار اپنے پیچھے اہلیہ انیتا دھیر اور بیٹے نکیتن دھیر کو سوگوار چھوڑ گئے ہیں۔
