حیدرآباد (دکن فائلز) پاکستانی شوبز انڈسٹری کی معروف اداکارہ درفشاں سلیم نے فریضۂ حج کی ادائیگی کے بعد اپنے روحانی سفر کے تجربات مداحوں کے ساتھ شیئر کرتے ہوئے ایک جذباتی پیغام جاری کیا ہے، جو سوشل میڈیا پر تیزی سے وائرل ہو رہا ہے۔
درفشاں سلیم نے انسٹاگرام پر حج کے دوران کی تصاویر اور یادگار لمحات شیئر کرتے ہوئے لکھا کہ یہ سفر ان کی زندگی کے سب سے خوبصورت اور یادگار تجربات میں شامل ہو گیا ہے۔ انہوں نے کہا کہ انہیں سب سے زیادہ خوشی اس بات کی ہے کہ وہ اپنے والدین کے ساتھ اللہ کے گھر کی حاضری کی سعادت حاصل کر سکیں۔
اداکارہ نے بتایا کہ رمی کے پہلے ہی دن ان کی طبیعت خراب ہو گئی تھی اور وہ شدید کمزوری محسوس کر رہی تھیں، لیکن اس کے باوجود انہوں نے حج کے تمام مناسک مکمل کیے۔ ان کے مطابق اس روحانی سفر نے انہیں صبر، شکر اور اللہ تعالیٰ پر مکمل بھروسے کا سبق دیا۔
درفشاں نے دورانِ حج مختلف ممالک سے تعلق رکھنے والی خواتین سے ملاقاتوں کا بھی ذکر کیا اور کہا کہ ان کے ساتھ مل کر دعائیں مانگنا، عبادات کرنا، خوشیاں بانٹنا اور زندگی کے مختلف تجربات سننا ان کے لیے انتہائی متاثر کن رہا۔ انہوں نے کہا کہ حج کے دوران انہیں دین اسلام کو صرف الفاظ میں نہیں بلکہ عملی زندگی میں دیکھنے اور محسوس کرنے کا موقع ملا۔
اپنے جذبات کا اظہار کرتے ہوئے اداکارہ نے لکھا کہ وہ ابھی تک اس روحانی کیفیت کو مکمل طور پر الفاظ میں بیان نہیں کر سکتیں، لیکن ایک بات ضرور جانتی ہیں کہ وہ اپنے دل پر برسوں سے موجود کئی جذباتی بوجھ اور پریشانیوں کو مکہ مکرمہ میں چھوڑ آئی ہیں۔ ان کے مطابق حج نے انہیں دنیاوی وابستگیوں سے بلند ہو کر مکمل طور پر اللہ تعالیٰ کے سامنے سرِ تسلیم خم کرنے کا درس دیا ہے۔
انہوں نے کہا کہ اگرچہ جسم تھکن اور درد محسوس کر رہا ہے لیکن ان کا دل پہلے سے کہیں زیادہ مطمئن، پُرسکون اور روحانی طور پر آسودہ ہے۔ درفشاں سلیم نے دعا کی کہ اللہ تعالیٰ ہر مسلمان کو حج کی سعادت نصیب فرمائے اور یہ مقدس سفر ہر انسان کے باطن میں مثبت تبدیلی پیدا کرے۔
