الجزائرمیں ایک نوجوان کی بینائی بحال ہونے کا حیران کن واقعہ رونما ہوا ہے۔ العربیہ اردو کے مطابق یہ واقعہ الجزائر کی تیارت ریاست میں پیش آیا جب ایک نابینا نوجوان عید کے دوسرے روز مسجد میں مغرب کی نماز ادا کررہا تھا۔ دو سال سے بینائی سے محروم نوجوان کی بینائی لوٹ آئی۔
مقامی میڈیا کو دیئے گئے ایک بیان میں احمد قداری نے کہا کہ اللہ تعالیٰ نے عید الاضحی کے دوسرے دن مسجد کے اندر مغرت کی نماز کے دوران حالت سجدہ میں ان کی بینائی بحال کردی حالانکہ وہ صحت یاب ہونے کی امید کھو بیٹھے تھے۔
احمد قداری نے کہا کہ جب نماز کا وقت ہوا اور اقامت کے بعد میں مسجد میں آگے بڑھا۔ نمازیوں کے ساتھ قطار میں کھڑا ہو گیا ہاتھ اٹھائے اور دعا کی کہ اللہ بینائی کھول دے۔ پھرامام کے بعد تکبیر کہی۔ معمول کے مطابق تیسری رکعت میں میں سجدے سے اٹھا، بے ساختہ آنکھیں کھولیں تو مجھے پیلا فرش دکھائی دیا۔ یہ مسجد کے قالین کا رنگ تھا اور مجھے سامنے ہرچیز صاف دکھ رہی تھی۔
قداری نے مزید کہا کہ مجھے یقین نہیں آیا کہ کیا ہوا۔ میں نے ایک نمازی کا اپنی طرف کا ہاتھ پکڑا۔ میں اسے دیکھتا رہا کہ کیا میں سچ مچ میں بینا ہوگیا ہوں۔ نمازیوں نے دوسرا سجدہ کیا اور تیسری رکعت مکمل کی۔ میں حیران رہ گیا تھا کہ میرے ساتھ کیا ہو رہا ہے۔
قداری نے گفتگو جاری رکھتے ہوئے کہاکہ “جب نمازیوں نے مغرب کی نماز مکمل کی تو جس نمازی کا میں نے ہاتھ تھاما تھا اس نےپوچھا آپ کو کیا ہوا ہے؟ میں نے اس سے کہا کہ میں دیکھ سکتا ہوں۔ میری بینائی کی واپسی پر وہ بھی حیران تھا۔
