آئی سی سی کرکٹ ورلڈ کپ 2023 کے سلسلے میں وارم اپ میچز کا شیڈول جاری کردیا گیا۔ انٹرنیشنل کرکٹ کونسل (آئی سی سی) کی جانب سے جاری شیڈول کے مطابق وارم اپ میچز کا آغاز 29 ستمبر سے ہوگا۔ پہلے میچ میں بنگلادیش اور سری لنکا کی ٹیمیں آمنے سامنے آئیں گی۔ اسی دن جنوبی افریقہ اور افغانستان کے درمیان وارم اپ میچ کھیلا جائے گا جبکہ پاکستان کا مقابلہ نیوزی لینڈ سے ہوگا، یہ میچ حیدرآباد میں کھیلا جائے گا۔
30 ستمبر کو ہندوستان اور انگلینڈ کے درمیان میچ گوہاٹی میں کھیلا جائے گا، جبکہ اس دن کے ایک اور میچ میں آسٹریلیا اور نیدرلینڈز کی ٹیمیں آمنے سامنے ہوں گی۔ انگلینڈ اور بنگلادیش کے درمیان میچ 2 اکتوبر کو کھیلا جائے گا جبکہ نیوزی لینڈ اور جنوبی افریقہ کی ٹیمیں بھی اسی دن مدمقابل ہوں گی۔
تین اکتوبر کو افغانستان اور سری لنکا کے درمیان وارم اپ میچ کھیلا جائے گا، میزبان ٹیم انڈیا بھی 3 اکتوبر کو میدان میں اترے گی، اس کے مقابلے پر نیدرلینڈز کی ٹیم ہوگی۔
